Rancaño viuse obrigado a recuar pola presión socialista e só percibirá as indemnizacións, dietas e kilometraxe previstas nas bases de execución do orzamento vixente
Abadín, 8 de agosto de 2025. O Grupo Municipal Socialista de Abadín denunciou hoxe no pleno municipal a manobra do alcalde, Xosé María López Rancaño, que pretendía aprobar unha “indemnización diaria” de 53,34 euros brutos por seguir como rexedor malia cobrar xa a súa pensión. Grazas á presión socialista, Rancaño viuse obrigado a retirar a proposta no último momento e anunciar que só percibirá as indemnizacións, dietas e kilometraxe previstas nas bases de execución do orzamento vixente.
“Era un dobre salario encuberto, incompatible coa pensión, como xa advertira a secretaria-interventora. O alcalde viuse forzado a recuar”, subliñou o voceiro socialista, Pablo Díaz. “O que pretendía era seguir cobrando a súa pensión e, a maiores, pasar a factura aos veciños por cada día no despacho. Grazas á nosa presión, esa manobra fracasou”.
O informe da secretaria-interventora do Concello foi claro ao advertir que a proposta non era unha verdadeira indemnización por gastos ocasionais, senón un soldo encuberto que suporía dedicación parcial ou exclusiva, obrigando a cotizar á Seguridade Social e resultando incompatible coa xubilación. Ademais, sinalaba que a percepción destas cantidades de forma periódica e recorrente non ten encaixe legal e debe considerarse retribución.
No pleno, cando se ía tratar a parte relativa á indemnización proposta por López Rancaño, o propio alcalde retirouna e limitouse a comunicar que se acollerá ás contías xa aprobadas no pleno de organización desta lexislatura para indemnizacións, dietas e kilometraxe. “Seguiremos vixiantes para que non intente reactivar por outra vía o que hoxe se viu obrigado a retirar”, advertiu Díaz.
Este episodio chega nun momento de evidente debilidade e inestabilidade do goberno local, despois de que no propio pleno de hoxe se dera conta da dimisión de Tania Rey Eimil, concelleira de Benestar Social do PP, quen renunciou tamén á súa dedicación exclusiva e deixou de prestar as súas funcións no executivo.
Na sesión, os socialistas tamén reclamaron explicacións ao goberno local por tres asuntos que preocupan especialmente á veciñanza. En primeiro lugar, denunciaron a falta recorrente de abastecemento de auga nas parroquias de Castromaior e As Goás, unha situación que se repite cada verán e que deixa a numerosas vivendas sen servizo.
En segundo lugar, cuestionaron os criterios arbitrarios para o desbroce de pistas, que xeraron numerosas queixas entre a veciñanza. Poñen como exemplo o caso de Moncelos, onde se actuou en tres viais, sendo un deles o que pasa diante da casa dunha concelleira do PP, mentres que o resto quedaron sen limpar.
Por último, advertiron do atraso na resolución do proceso de selección da praza de conserxe, que debía estar cuberta no mes de maio e que, a un mes do inicio do curso escolar, segue sen adxudicar.
“O PSdeG de Abadín vai seguir facendo o que lle corresponde: defender aos veciños, frear abusos e obrigar ao goberno local a dar explicacións e rectificar cando se equivoca”, concluíu Díaz.
Este luns, 14 de setembro, visitaron Mondoñedo, a Praia das Catedrais e Santa Cruz. A viaxe evocou as lecturas de Cunqueiro e as súas Crónicas do sochantre, nun percorrido que incluíu a catedral mindoniense e o barrio dos Muíños, ademais da emblemática praia de Augas Santas. Pola tarde participaron nunha exhibición de billarda grazas á estimable colaboración dos billardeiros da comarca. O martes partiron de regreso a Loktudi.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Este luns, 14 de setembro, deu comezo un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
A programación arrancará de 13:00 a 15:00 horas cos pinchos de benvida e unha sesión vermú a cargo do DJ Peabody. A continuación, de 15:00 a 17:00 horas, terá lugar a comida na Finca San Antonio, cun menú composto por salpicón de rape e langostinos, codillo con patacas, pan, postre, café, chupito e bebida incluída. Os tickets teñen un prezo de 40 euros e poden adquirirse en O Rincón, Confitería Alianza, Comercial Anjor e Perruquería Oriola; os menores de 5 anos asistirán de balde e os de 6 a 10 anos contan cun desconto do 50 %. Xa a partires das 18.30 horas haberá sesión de música con Toxo Guayaba.
