Galegos e galegas temos a grande sorte de que, neste país e institucionalmente, Vox non exista. Nos últimos procesos electorais estatais e locais de 2023 e nacionais galegas e europeas de 2024 non quitou un só representante, agás a concelleira de Avión que liscou de semellante partido antes dun ano de mandato.
O que tiña que ser unha vantaxe democrática arestora xa non o é. Porque o PPdeG, que goberna a Xunta e máis, pola mínima, as Deputacións de Pontevedra e Ourense, está a desenvolver un proceso multifronte: para recuperar gobernos locais nos que perdeu as alcaldías e pode recuperalas agora con concellerías tránsfugas, para deslexitimar á posición, nomeadamente nacionalista-soberanista e, secundariamente, socialista no Parlamento de Galicia e máis para desprestixiar primeiro e, despois, deslexitimar á oposición galega, aos gobernos locais alternativos e máis ás persoas creadoras de contidos nas redes e opinións nos medios diverxentes a respecto do PP. Un proceso no que está a tensionar a vida política galega, a da maioría dos seus concellos e mesmo a súa vida social e na que copia do modelo extremista e polarizador de Vox.
Con Feijóo á fronte do PP estatal e con Rueda á fronte do PP nacional, afondando cualitativamente no ronsel feijoniano de lle facer oposición á oposición e de lle botar a culpa de todo aos demais, nomeáronse persoas tan desaqueladas a respecto de proxectos demócratas, centristas e europeos como a secretaria xeral do PPdeG, Paula Prado ou o secretario xeral do PP estatal, Miguel Tellado. Un PPdeG no que sobrancearon antes persoas tan dignas e demócratas como o antigo secretario xeral Xesús Palmou ou o antigo voceiro parlamentario galego Pedro Puy e que, xa que logo, enfrontou unha moi substancial remuda que o afasta de vez do centro-dereita europeo achegándoo ao extremismo de Vox ou de Chega.
Na vida local este xiro extremista albíscase nas mocións de censura que substituíron as alcaldías acadadas polo BNG ou por outras forzas progresistas en Ribeira, Outes, Fisterra, Carral ou Touro. Ao tempo líderes populares locais, como os de Compostela, Pontevedra e Lugo (Vera, Dominguez e Candia) teiman nunha estratexia de deslexitimar, no seu exercicio e até mesmo na súa orixe, aos gobernos locais das devanditas cidades, botando man de tácticas polarizadoras máis achegadas ao trumpismo e ao bolsonarismo ca a das oposicións democráticas europeas. Mentres, o PPdeG impón en Ourense remudas orgánicas no seu liderado do grupo municipal para consolidar a catástrofe do goberno local de Jácome.
Mais esta enxurrada, propia de partidos autoritarios, non se da só no Parlamento de Galicia e nas Cámaras municipais, senón que se está a desenvolver contra os creadores de contidos e opinións políticos e sociais alternativos á ideoloxía dereitista e españolista do PPdeG, quer nas redes sociais, quer nos propios medios de comunicación tradicionais. Impresiona, nomeadamente, como son estigmatizadas (mesmo ás veces en directo ou case en directo) opinións non só a prol da soberanía galega ou do substancial incremento do noso autogoberno, senón da nosa autoxestión enerxética ou adopción da tarifa galega, da recadación galega de todos os tributos para garantirmos un bo financiamento, da compatibilización da produción eólica en Galicia cun pacto xusto coas comunidades territoriais que a aturan ou coa remunicipalización de determinados servizos básicos.
Ademais, este clima está xa a chegar ás redes sociais, aos centros escolares dende a inspección educativa, ás entidades cívicas, ás rúas e ás parroquias (xusto é recoñecer que hai lugares na Galicia que levan sufrindo este clima máis de 40 anos) e comezan degradar relacións persoais e de convivencia. Semella que este clima pode deteriorar a convivencia democrática, porque, dende logo, a nova Galicia alternativa é dificil que ature esta caste de presións antidemocráticas.
Aínda estamos a tempo de tentar afortalarmos a convivencia democrática na Galicia. Mais teño para min que a dirección nacional galega do PP arestora non ten este obxectivo na súa axenda.
O grupo, composto por cinco mulleres e sete homes cunha media de 26 anos, foi recibido pola subdelegada do Goberno, Olimpia López, que lles agradeceu o compromiso co servizo público e destacou o papel esencial da Policía Nacional na seguridade cidadá. Oito axentes estarán na Comisaría de Lugo, dous en Monforte e dous en Viveiro. Ao finalizar as prácticas, escollerán destino definitivo segundo a puntuación obtida no proceso selectivo.
A iniciativa busca poñer en valor a diversidade cultural do municipio a través da gastronomía, convidando ás persoas de diferentes países a elaborar pratos típicos que se ofrecerán de forma gratuíta ao público. O Concello asumirá o custo dos ingredientes e asignará a cada participante un posto identificado co seu país de orixe. As inscricións poden realizarse ata o 29 de xullo enviando un correo a feiras@vilalba.es. Rouco chamou á participación para seguir construíndo unha Vilalba aberta e integradora, nunha feira que quere consolidarse como espazo de convivencia e dinamización da feira tradicional.
Ata o 4 de agosto poderán realizarse as renovacións, mantendo as tarifas aprobadas en asemblea: 200 € e 250 € para adultos, e acceso gratuíto para menores grazas ao convenio coa Fundación Imdecum, con opción voluntaria de abono infantil por 40 € con reserva de asento. A partir do 5 de agosto activaranse as novas altas. Os abonos poderán tramitarse a través de CLUBER ou presencialmente na oficina do club, con horario de mañá e tarde en xullo e só de mañá en agosto.
A Presidenta Carmela López destacou o valor deste produto emblemático da Mariña e o traballo do sector pesqueiro. Rocío Rivera e Herminia Pernas puxeron en valor a tradición mariñeira de Burela e o papel dos mariñeiros da Moncloa. O público degustou 450 tapas elaboradas con bonito nunha xornada que serviu de escaparate desta cita gastronómica e de convite a visitar Burela a próxima fin de semana.
As crianzas desfrutaron dunha refrescante xornada con inchables e xogos acuáticos na contorna do complexo deportivo da Veiga.
Trátase dunha mostra de 28 fotografías de gran formato do naturalista Ezequiel Martínez que reivindica a diversidade e a conservación da fauna salvaxe. A iniciativa, organizada polo Concello da Pastoriza en colaboración con ABANCA e Afundación dentro do proxecto Corrente cultural, poderá visitarse de balde ata o 26 de agosto. As imaxes, acompañadas de textos divulgativos elaborados por especialistas de Naturnova, amosan especies emblemáticas como o oso pardo, a cegoña, o cervo ou a aguia imperial, convidando a reflexionar sobre a importancia de protexer o patrimonio natural.
O campo de fútbol do Cascabeiro acolleu o pasado sábado a III Festa do Mexillón, organizada polo Celta Barreiros. Centos de persoas achegáronse a gozar dunha tarde de gastronomía e de música. En total foron servidas 670 racións entre veciñanza e visitantes, que saborearon mexillóns e lacón. Os organizadores amosasen satisfeitos da acollida: “estamos contentos pola boa resposta dos asistentes”. E tiveron palabras de agradecemento “para os Concellos de Barreiros e de Foz pola boa colaboración”.
