O PP de Foz reclama de novo explicacións “polo parón das obras do vial na zona das Torres”

“Moitos veciños , para acceder aos seus garaxes, vense obrigados a dar unha volta de máis dun quilómetro pola estrada da praia de Llas e o camping”

Foz, 7 de outubro de 2025. O Partido Popular de Foz volve a preguntar ao señor alcalde cal é o motivo polo que a obra do vial da zona das Torres continúa sen rematar nin abrirse ao tráfico, a pesar de que se trata dunha intervención sinxela que se iniciou no mes de marzo e que contaba cun prazo de execución curto.

Trátase dunha actuación cun orzamento de arredor de 70.000 euros, que leva practicamente paralizada desde comezos do verán, sen que o Concello dea explicacións claras sobre o motivo do atraso.

O Partido Popular de Foz lembra que xa hai meses reclamou a reapertura inmediata ao tráfico, tal e como prometera o alcalde, quen asegurara que se faría “de maneira inmediata” unha vez finalizado o asfaltado. Pero, máis de tres meses despois, a obra segue pechada e os veciños continúan a padecer as consecuencias.

Moitos deles, para acceder aos seus garaxes, vense obrigados a dar unha volta de máis dun quilómetro pola estrada da praia de Llas e o camping, o que supón un claro prexuízo e unha situación incomprensible.

O PP de Foz esixe ao alcalde que explique cal é o problema real desta obra: se existen conflitos coa empresa adxudicataria, se a obra está ou non pagada, ou se simplemente hai unha falta de xestión e control por parte do goberno local.

“O que está pasando co vial das Torres é un insulto á intelixencia dos veciños de Foz, que pensaban que, unha vez rematado o asfaltado, o tráfico se abriría aos poucos días. Pero nada máis lonxe da realidade: a obra segue parada, con valados e un aspecto de abandono que provoca incredulidade e cabreo”, afirma o voceiro popular, Javier Castiñeira.

Desde o Partido Popular lembran, ademais, que esta situación repítese en moitas outras obras municipais, como a da rúa Irmandiños, que acumula xa máis de dous anos de retraso, demostrando unha vez máis a falta de planificación e eficacia do goberno local.