“Viveiro merece proxectos reais, non anuncios baleiros”, aseguran os socialistas

Viveiro, 19 de novembro, 2025. Desde o Grupo Municipal Socialista de Viveiro valoran positivamente que a alcaldesa se mova e pida investimentos para a cidade. A recente reunión na Deputación de Lugo co vicepresidente, para tratar asuntos deportivos e culturais, é un paso importante. “Sempre é necesario reclamar recursos para o noso Concello”.

O silencio ante a Xunta

“O que sorprende é que estes movementos só se dirixan á Deputación, mentres que a Xunta de Galicia, responsable de competencias clave, non recibe ningunha esixencia. Durante meses, as múltiples viaxes da alcaldesa a Santiago traducíronse en fotos, pero non en proxectos concretos para Viveiro”, explican desde o PSOE local.

Promesas incumpridas

• Humanización do muelle de Viveiro: anunciada con 1,8 millóns de euros, só conta con 165.000 nos orzamentos da Xunta para 2026.
• Variante de Viveiro: prometida con 10 millóns, reducida a 4 millóns, compartidos coa Vac Costa Norte. Unha cifra insuficiente para avanzar nesta obra clave.
• Conservatorio Profesional de Música: competencia da Xunta, sen compromiso real nin proxecto en marcha.

Deputación si, Xunta non

“Cada vez que Viveiro precisa investimentos, a alcaldesa recorre á Deputación. Pero non esixe á Xunta os compromisos que lle corresponden. Viveiro necesita proxectos reais e un goberno municipal que reclame onde realmente debe facelo”.

Compromisos pendentes

O PSOE de Viveiro lembra que o acordo da moción de censura, apoiada por Por Viveiro, incluía 6 millóns de euros para a cidade por parte da Xunta. “Ata o de agora, só temos fotos con conselleiros, pero ningún proxecto comprometido2.

“Viveiro merece compromisos reais, non anuncios baleiros”, conclúen.