Viveiro, 24 de xaneiro, 2026. As familias do CEIP Plurilingüe de Covas denuncian que a Xunta difundiu información falsa e reclaman os apoios educativos que o propio Goberno galego recoñece como imprescindibles. Tras as intervencións realizadas na Comisión de Educación e Cultura do 22 de xaneiro de 2026, as familias expresan publicamente a súa indignación polas afirmacións da Administración autonómica, que —aseguran— non se corresponden coa realidade do centro e buscan enganar á cidadanía e minimizar unha situación de urxencia educativa.
En primeiro lugar, consideran falsos os datos ofrecidos sobre o persoal especialista en apoio educativo. A Xunta afirmou que o centro conta con 2 especialistas en Audición e Linguaxe (AL) e 2,5 en Pedagoxía Terapéutica (PT), dotación que tanto a dirección como as familias levan reclamando desde antes do inicio do curso por considerala imprescindible. Porén, a realidade —indican— é que o centro só dispón de 1,5 AL e 2 PT, sendo unha delas a directora, o que supón 7 horas semanais menos de atención directa ao alumnado. As familias esixen saber se ese incremento foi aprobado e non comunicado, se está pendente de asignación ou se simplemente se recoñece como necesario pero non se considera prioritario facelo efectivo. O que non aceptan é que se presente como existente un persoal que non está no centro.
En segundo lugar, consideran gravísimas as afirmacións que minimizan a falta desas 7 horas de PT ao suxerir que poderían ser cubertas polo anterior director, que “xa non ten esas horas de adicación”. As familias lembran que o exdirector exerce actualmente como mestre de Educación Infantil a xornada completa e denuncian que esta insinuación supón unha falta de respecto tanto cara a el como cara ao persoal especialista en apoio educativo, cuxo labor —subliñan— é específico, cualificado e non substituíble polo resto do profesorado.
En terceiro lugar, critican o uso de datos descontextualizados sobre o número de alumnos por aula, que consideran profundamente enganoso. Que o centro estea por debaixo dos ratios máximos non implica que non precise apoios adicionais. O 22% do alumnado presenta necesidades específicas de apoio educativo (NEAE), o que implica bloqueo de prazas e unha maior carga de atención individualizada. Así, que unha aula teña 19 matrículas non significa que existan 6 prazas libres reais. As familias denuncian que estes datos “en frío” ignoran deliberadamente a realidade do centro. Ademais, lembran que a baixa matrícula está directamente relacionada co abandono institucional que sofre o CEIP Plurilingüe de Covas, un centro sen comedor escolar nin transporte, o que obriga moitas familias a buscar alternativas por motivos de conciliación.
Por último, rexeitan a afirmación de que non existen recortes respecto ao curso pasado. Aseguran que comparar a situación actual coa de hai 20 anos só pretende desviar o debate, cando o feito obxectivo é que o centro conta con medio posto menos de AL e con 7 horas menos de PT que no curso anterior. “Por moito que se maquille, son recortes reais que afectan directamente á atención do alumnado”, afirman.
As familias do CEIP Plurilingüe de Covas aseguran que as intervencións da Xunta non só faltan á verdade, senón que buscan ocultar unha situación de urxencia educativa que afecta ao centro e ás propias familias. Critican que se fale de respecto ás familias para, acto seguido, negar, minimizar ou falsear a realidade.
Con impotencia, lamentan que a solicitude de incremento da dotación de profesorado de Audición e Linguaxe e Pedagoxía Terapéutica fose finalmente rexeitada, con 9 votos en contra do PP e 7 votos a favor do BNG e do PSOE.
As familias anuncian que seguirán loitando, mobilizadas e organizadas, ata que o centro conte cos recursos que a propia Xunta recoñeceu de facto como imprescindibles para garantir unha educación pública, inclusiva e de calidade.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
A Garda Civil de Burela tomou declaración este 10 de xuño a unha representante do departamento en liña de Porcelana de Sargadelos, que denunciou unha estafa na que se emprega a imaxe da empresa para enganar clientes. Segundo explicou, desde finais de abril están a aparecer páxinas web falsas con descontos do 80% e perfís fraudulentos en redes sociais como Instagram, TikTok e Facebook, a través dos que varios usuarios xa foron estafados. A compañía presentou denuncias contra distintos dominios e contas, das que só unha continúa activa, e achegou tamén os rexistros da marca e as comunicacións realizadas ante Meta. A denuncia foi formalizada no cuartel da Garda Civil de Burela, onde quedou incorporada ás dilixencias abertas polo corpo.
O deputado galego Francisco Millán Mon explicoulles o día a día da súa actividade nesta cámara e a importancia da Unión Europea para Galicia e viceversa. Desde a dirección do centro agradecen “a súa exposición e o trato dispensado ao alumnado e profesorado desprazado a Bruxelas”. Neste 2026 cúmprense 40 anos da adhesión de España á Comunidade Económica Europea, así se denominaba naquel momento. O IES de Ribadeo é Escola Mentora do Programa Escolas Embaixadoras do Parlamento Europeo.
Foi unha xornada máxica na que a música e a convivencia se deron a man nunha contorna única. Os instrumentos de corda encheron de melodías os xardíns do centro, creando unha atmosfera especial que emocionou ao público asistente e puxo en valor o talento e a ilusión da mocidade. A alcaldesa de Cervo, Dolores García Caramés, non quixo perderse esta cita tan especial e desfrutou da tarde xunto ás persoas usuarias, e o persoal do centro. Durante o encontro, agradeceu o convite e felicitou á organización por promover actividades que fomentan a cultura, a inclusión e os espazos de encontro entre a veciñanza.
A mostra, aberta na sala de exposicións do Auditorio Municipal de luns a venres entre as 18:00 e as 22:00 horas, reúne preto de 30 obras de artistas emerxentes e consolidados, ofrecendo diversas miradas sobre a paisaxe, a identidade, a memoria e a realidade contemporánea. A alcaldesa, Marta Rouco, destacou o valor de que Vilalba forme parte desta programación compartida e o impacto positivo que supón para a actividade cultural local.
No acto impuxéronlles o birrete e entregáronlles diploma e orla. Despois cantaron unha canción para as familias asistentes. Houbo moitos aplausos e algunhas lágrimas de emoción.
A saída será ás 10:00 desde El Bao, con autobuses ás 9:00 desde Navia, e a chegada arredor das 16:30 seguida dunha festa na dársena. As inscricións estarán abertas do 31 de maio ao 12 de xuño na Casa do Deporte ou en liña por 7 €. O Concello anima a participar nesta cita que combina natureza, deporte e convivencia.
