O PSdeG acusa a Rueda de “estafar” a Viveiro cun proxecto que rebaixa a vía de altas prestacións

Os socialistas preguntarán no Parlamento polas consecuencias que terá para a veciñanza a modificación que o PP obrigou a incluír no PXOM en relación cunha VAC que agora desbota

Viveiro, 31 de xaneiro de 2026. O que ía ser unha vía de alta capacidade quedará finalmente nun tramo de estrada convencional. O PSdeG denunciou hoxe en Viveiro que o proxecto que vén de presentar Rueda como alternativa para aliviar o tráfico que padece o núcleo urbano do municipio mariñán é “unha estafa que non merece a veciñanza”. Así o explicou a secretaria de organización socialista e deputada autonómica, Lara Méndez, que compareceu na compaña do senador César Mogo, a deputada Patricia Otero e a portavoz socialista no Concello viveirense, María Loureiro.

Méndez criticou que o presidente da Xunta se achegarse a Viveiro en pleno Nadal para presentar un proxecto que, “no mellor dos casos, o primeiro tramo empezarase a facer en 2028”. Ademais, tal como a reformula a Xunta, a infraestrutura “non vai aliviar o problema da conxestión nin da conectividade de Viveiro e da Mariña coa provincia da Coruña e co resto de Galicia”, afirmou, e subliñou que non é o proxecto “que merece a veciñanza de Viveiro nin da Mariña”. Por iso, esixiulle a Rueda que rectifique e retome a construción dunha vía de altas prestacións “que cumpra o obxectivo de dinamizar un concello clave para A Mariña”.

“Non se pode rebaixar máis unha obra pública. O que fan o PP e a Xunta é unha estafa. Non se pode ser máis miserable coa Mariña”, criticou Mogo, e engadiu, en referencia ao acordo que impulsou a moción de censura no Concello viveirense: “Aquí hai unha certeza, que o PP enganou á cidadanía, pero Por Viveiro foi enganado ou participou tamén no engano?”.

A Xunta trata a Viveiro como “un concello de segunda”

Patricia Otero lamentou pola súa banda, que o Goberno do PP reducise “drasticamente” o orzamento da infraestrutura para actuar nun tramo menos longo do previsto e aprazar “sine die” a construción do resto. “Se a iso engadimos que rebaixa tamén a categoría da vía, pos a verdade é que o que nos veu presentar Rueda son tres rebaixas dunha tacada”, censurou.

María Loureiro lamentou que a Xunta volva tratar a Viveiro como “un concello de segunda categoría”. Coincidiu con Mogo en que a VAC era “o proxecto estrela” da moción de censura que impulsaron PP e Por Viveiro, e agora a alcaldesa e os independentes “renuncian á vía de alta capacidade” para deixala nunha simple estrada convencional. A portavoz do Grupo Municipal Socialista advertiu dos efectos que ten sobre a comarca a falta de infraestruturas de comunicación axeitadas e que a cidadanía vía con “esperanza” a construción dunha vía de altas prestacións como actuación clave para o desenvolvemento industrial de Viveiro e A Mariña, así como para o mantemento de postos de traballo. “E agora anuncian isto”, criticou.

Os efectos das decisións do PP sobre o Plan Xeral

Loureiro denunciou tamén que a Xunta e o PP “chantaxearon” ao seu goberno local durante a tramitación do Plan Xeral de Ordenación Municipal. “Dicían que había que incluír o trazado da VAC”, recordou, e sinalou que agora esa VAC xa non existe tal como estaba planificada.

Sobre este extremo incidiu tamén Lara Méndez, que anunciou que o PSdeG levará ao Parlamento unha iniciativa para que a nova infraestrutura se acometa tras “un proceso dialogado” co fin de que responda ás necesidades do municipio e da comarca. “Tamén imos preguntar que consecuencias legais ten a modificación que obrigaron a facer no PXOM sendo María Loureiro alcaldesa”, destacou.

A través desa iniciativa, os socialistas instan á Xunta a retomar o proxecto como unha verdadeira vía de alta capacidade, a avaliar o impacto que a renuncia á construír a VAC terá no PXOM de Viveiro e a adoptar as medidas necesaria para evitarlle á cidadanía prexuízos administrativos “derivados das decisións impostas pola propia Xunta durante anos”.

O futuro das comunicacións da Mariña

Os representantes socialistas recordaron durante a súa comparecencia que a comarca da Mariña padece un grave déficit de infraestruturas. E que a solución a ese problema pasa, principalmente, por completar a vía de alta capacidade Costa Norte e a autovía A-74, para manter conexións axeitadas coa A-8, polo leste, e a zona de Ortegal e Ferrolterra, polo oeste. Por ese motivo, esixíronlle á Xunta que rectifique e non escamotee recursos “cun proxecto a medias” para a variante de Viveiro e ao Goberno central que nos próximos Orzamentos do Estado inclúa a autovía.