Xove, 11 de febreiro, 2025. O BNG de Xove valorou no Pleno municipal a liquidación do orzamento de 2025, que recolle oficialmente unha necesidade de financiamento de 2.256.244,88 €. Para a formación nacionalista, esta cifra confirma unha tendencia que xa se viña repetindo nos últimos anos, despois de que en 2024 o desequilibrio ascendese a 3.554.814,95 €.
Un orzamento “pouco realista”
Durante o debate plenario, o BNG lembrou que xa advertira en decembro de 2024 do escaso realismo do orzamento aprobado para 2025. “Ninguén quere verse nesta situación, e menos tendo en conta o que recolle a interventora sobre a peculiaridade do noso concello, pero as previsións debían axustarse á realidade”, sinalaron.
A formación recoñeceu que o apagamento industrial foi unha causa de forza maior, mais lembrou que a previsión era que as cubas arrancasen no primeiro trimestre e alcanzasen case a plena actividade en outubro. Isto implicaba unha recuperación progresiva, non inmediata. Ademais, pola forma en que ALCOA se dá de alta no IAE, non se recuperarían cifras previas a 2023 ata o último trimestre.
A pesar diso, o orzamento elaborouse contando con 3 millóns de euros en ingresos industriais, cando nos exercicios anteriores as cifras reais foron de 17.000 € e 200.000 € aproximadamente. Para o BNG, isto supón “trasladar unha imaxe de normalidade que non se corresponde coa situación real”.
Case 11 millóns de remanente gastados en tres anos
O BNG tamén chamou a atención sobre a evolución do remanente de tesourería. Dos case 19 millóns existentes en 2023, quedan hoxe arredor de 8,5 millóns dispoñibles.
“Non é que non queiramos que se utilicen eses fondos, pero entre tanto parche e modificación de crédito, hai grandes infraestruturas —como a mellora da rede de abastecemento— que seguen sen acometerse. Os servizos deste concello son o orgullo de todos, pero iso non xustifica as trampas ao solitario que fai o equipo de goberno”, afirmaron.
Sen Plan Económico-Financeiro
Outro dos puntos destacados polo BNG foi a decisión de non elaborar o Plan Económico-Financeiro, a pesar da situación de inestabilidade orzamentaria. Segundo explicaron, a única indicación recibida desde a administración de Facenda da Xunta foi un “ti vai facendo” en galego.
O BNG agarda que esta interpretación se aplique “con igualdade a todos os concellos, e non só a aqueles gobernados polo Partido Popular”.
Chamamento á responsabilidade
Desde o BNG de Xove esperan que o equipo de goberno “saiba encarar esta situación con responsabilidade e acerto”, pois consideran que é o mellor para o conxunto da veciñanza e para o futuro do Concello.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
Finalizado o encontro, de carácter privado, o Cónsul asinou no Libro de Ouro da Deputación e a Presidenta fíxolle entrega dun agasallo institucional. Trala xuntanza Carmela López manifestou a súa satisfacción porque “traballamos para avanzar en novas vías de colaboración, e en posibles proxectos que serven para reforzar a relación entre a Deputación e o veciño país de Portugal”.
