O PSdeG do Vicedo iniciará ao longo de marzo a segunda rolda de “Escoitámosvos”

A iniciativa, posta en marcha en 2025, consiste en encontros abertos nas parroquias para coñecer de primeira man as preocupacións e propostas da veciñanza

O Vicedo, 27 de febreiro de 2026. O PSdeG do Vicedo iniciará ao longo do mes de marzo a segunda rolda da iniciativa “Escoitámosvos”, un proxecto de participación e proximidade co que a agrupación continúa percorrendo todas as parroquias do concello para escoitar directamente á veciñanza.

Esta iniciativa naceu coa finalidade de reforzar o contacto directo cos veciños e veciñas, coñecer de primeira man as súas preocupacións, recoller propostas e atender as inquedanzas que afectan ao día a día do municipio. Dende o PSdeG consideran que a política municipal debe basearse no diálogo constante, na transparencia e na presenza activa no territorio.

Durante a primeira rolda de encontros, celebrada nos últimos meses, abordáronse cuestións relacionadas cos servizos públicos, o estado das infraestruturas, a limpeza e mantemento dos espazos públicos, a seguridade viaria e outras necesidades específicas das distintas parroquias. As achegas recollidas permitiron trasladar ao Pleno municipal diferentes propostas e iniciativas.

Con esta segunda rolda, que se desenvolverá ao longo de marzo, o PSdeG do Vicedo reafirma o seu compromiso de seguir facendo unha oposición útil, construtiva e centrada nas persoas.

Dende a agrupación animan a toda a veciñanza a participar activamente nestes encontros, destacando que “escoitar é o primeiro paso para mellorar”.