A CAMOVI reunirá de novo a centos de deportistas en Viveiro o 18 e 19 de abril

Este ano está prevista a presenza de participantes de distintos puntos de España, así como dun grupo de Portugal

Viveiro, 20 de marzo de 2026. O director de Turismo de Galicia, Xosé Merelles, presentou esta mañá a Carreira de Montaña CAMOVI, nun acto no que estivo acompañado polo delegado territorial da Xunta en Lugo, Javier Arias. O evento, que chega en 2026 á súa 15 edición, celebrarase o 18 e o 19 de abril e enmárcase na aposta que Turismo de Galicia está facendo en Viveiro apoiando a súa promoción turística e potencial deportivo, as festas locais e festivais coma o Resurrection cun investimento global de case de 1M€.

Xosé Merelles destacou na presentación a aposta da Xunta polos eventos deportivos que, lembrou, “concentran un importante poder de convocatoria para o turismo”. Neste sentido, destacou que o turista que viaxa a Galicia por motivos deportivos gasta de media diaria 119,5€ por persoa e día, o segundo máis elevado despois do turismo de congresos e feiras, segundo os datos da Enquisa de Turismo de Residentes dos últimos dous anos e a falta dos datos do último trimestre de 2025.

“Desde a Xunta de Galicia estase a promover esta modalidade turística”, sinalou Merelles. Un impulso que se exemplifica, engadiu, con eventos coma a carreira CAMOVI, que conta cunha programación variada, a través da que poñer en valor o turismo deportivo.

Xosé Merelles abundou ademais no impacto do turismo deportivo na desestacionalización e a distribución territorial da oferta, lembrando que CAMOVI reúne anualmente nas súas edicións un promedio dunhas 1.000 persoas en Viveiro, o que contribúe a impulsar a Mariña luguesa como destino turístico fóra de tempada.

Precisamente, durante o mes de xaneiro, 1.523 persoas fixeron 2.735 pernoctacións na localidade, o que supón un ascenso do 3,9% e do 5,6%, respectivamente, en relación a xaneiro de 2025.

CAMOVI

A carreira de montaña Montes de Viveiro-CAMOVI ten a súa orixe nun reto que xurde para percorrer todos os montes que rodean o Val do Landro en Viveiro. Desde 2011, a carreira foi evolucionando ata que en 2016 foi seleccionada como a 2ª proba da Copa de España de Carreiras de Montaña. Este ano está prevista a presenza de participantes de distintos puntos de España, así como dun grupo de Portugal.

A programación do evento divídese en dúas xornadas, baixo a clave de ofrecer unha experiencia integral do destino Viveiro. Durante o sábado 18 de abril celebraranse a andaina e as carreiras infantís, mentres que o domingo 19 desenvolveranse as catro modalidades de carreira -maratón, media maratón, 10 quilómetros e relevos-.