Carmela López reúne ao Presidente de Cabo Verde e reforza a cooperación entre Galicia e o país africano

Lugo, 14 de marzo, 2026. O Presidente da República de Cabo Verde, José María Neves, recibiu no Palacio Presidencial á Presidenta da Deputación de Lugo e Alcaldesa de Burela, Carmela López, no marco da visita institucional que esta está a realizar ao país africano. O encontro dá continuidade ao convite formulado polo mandatario caboverdiano durante a súa visita a Burela en 2024 e permitiu avaliar os avances acadados desde aquela primeira reunión, especialmente no ámbito consular.

López destacou que, malia os progresos realizados, é preciso “unha maior implicación para atender axeitadamente as demandas da poboación caboverdiana residente na provincia de Lugo, facilitar os trámites administrativos e consulares e dar unha resposta máis eficiente ás necesidades desta comunidade”. A presidenta agradeceu a boa disposición mostrada polo Presidente Neves e valorou o compromiso de reforzar a presenza da Embaixada de Cabo Verde en España na provincia.

Durante a reunión, o Presidente puxo tamén en valor o traballo en materia de cooperación que o Goberno de España desenvolve en Cabo Verde, contribuíndo á rehabilitación de espazos, ao impulso de proxectos de emprendemento e á implantación da Axenda 2030. Neves expresou o seu interese en abrir novas vías de colaboración coa Deputación de Lugo neste ámbito.

Interese polo encontro ‘As Elixidas’

O mandatario caboverdiano interesouse ademais polo II Encontro Internacional de Mulleres Electas ‘As Elixidas’, celebrado estes días na cidade de Praia e no que participa Carmela López como integrante da delegación galega do Fondo Galego de Cooperación e Solidariedade. O foro reuniu máis de 130 representantes municipais de Cabo Verde, Mozambique e Galicia para analizar o papel da muller no poder local.

O encontro concluíu coa aprobación da Declaración da Praia, un documento que reafirma o compromiso das responsables municipais por avanzar na igualdade, reforzar a participación política das mulleres e promover políticas públicas con perspectiva de xénero. A declaración subliña que a participación plena das mulleres na vida política fortalece a democracia, fai as comunidades máis xustas e impulsa un desenvolvemento máis sustentable.

Ao longo das sesións, ‘As Elixidas’ converteuse nun espazo de diálogo, sororidade e aprendizaxe mutua, no que se compartiron experiencias sobre políticas de igualdade, orzamentos con enfoque de xénero e ferramentas para avanzar cara a unha gobernanza máis inclusiva. A iniciativa, organizada polo Fondo Galego e pola Associação Nacional dos Municípios de Cabo Verde, celebrouse baixo o lema ‘Electas no local, unha voz global’ e coincidiu co Día Internacional das Mulleres e co impulso do ODS 5 da Axenda 2030.

Reunión coa Secretaria de Estado do Ministerio das Comunidades

A axenda institucional de López incluíu tamén un encontro coa Secretaria de Estado do Ministerio das Comunidades, Vanuza Francisca Correia Teixeira Barbosa, na sede do propio Ministerio. Ambas responsables analizaron vías de colaboración para reforzar as relacións coa diáspora caboverdiana e promover entre a comunidade residente en Lugo os programas e iniciativas impulsados polo Ministerio.
Entre as propostas estudadas figura o desenvolvemento de proxectos dirixidos especificamente á poboación caboverdiana asentada na provincia, un territorio cunha presenza especialmente significativa desta comunidade e cunha longa historia de vínculos sociais, culturais e económicos con Cabo Verde.
Tamén se abordou a posibilidade de impulsar iniciativas orientadas á mocidade, destinadas a mellorar o rendemento escolar, favorecer a continuidade dos estudos e reforzar as expectativas académicas e profesionais das novas xeracións, incorporando compoñentes motivacionais e de acompañamento educativo.

López subliñou a importancia de reforzar os espazos de cooperación institucional e o diálogo permanente entre administracións, co obxectivo de seguir construíndo pontes entre Galicia e Cabo Verde e apoiar ás comunidades que comparten unha relación histórica e humana moi estreita.