Mogo acusa os senadores do PP de Lugo de manipular a resposta do Goberno sobre o xulgado de Viveiro

A Mariña, 14 de marzo, 2026. “Non hai día en que os senadores do PP por Lugo non inventen algo novo para tentar sacar cabeza nos medios de comunicación e, de paso, competir cos deputados do mesmo partido na súa carreira de falsidades”, afirma o senador socialista lucense César Mogo.

Nesta ocasión, o motivo é a situación dos xulgados de Viveiro e Sarria. Nunha resposta parlamentaria, o Goberno non citou ningún partido xudicial en concreto, limitándose a explicar o desenvolvemento do proxecto para crear 500 novas prazas xudiciais en todo o Estado. Non mencionou nin Viveiro nin Sarria, como tampouco mencionou ningún outro.

A pesar diso, os senadores da dereita lucense manipularon a resposta ante os medios, asegurando que o Goberno decidiu non crear esas prazas. Unha interpretación interesada que, segundo Mogo, encaixa nunha estratexia xa habitual pero que agora está a alcanzar cotas delirantes.

O senador socialista sinala que non sorprende tanto que Serrano e Balseiro recorran a este tipo de prácticas, pero si chama a atención que o faga tamén, de maneira reiterada, alguén coa traxectoria de José Manuel Barreiro, quen chegou a ser portavoz parlamentario do PP.

Mogo considera que, a medida que se achegue o final da lexislatura, os senadores populares intensificarán estas invencións para gañar presenza mediática, especialmente dentro do seu propio partido. Con todo, insiste en que o que están facendo é un engano con todas as letras, xa que o Goberno en ningún momento citou expresamente os xulgados de Viveiro e Sarria.