O alumnado de 6º de Primaria do Sagrado Corazón de Ribadeo celebra a súa graduación e paso á ESO

Ribadeo, 13 de xuño de 2026. O alumnado de 6º curso de Educación Primaria do Colexio Sagrado Corazón, de Ribadeo, celebrou cun evento a súa graduación e o seu paso á ESO.

O acto tivo lugar na capela do colexio e participaron tamén familiares e profesorado. O peso da celebración correu a cargo do alumnado que o curso que vén estará en ESO, pero tamén houbo intervencións dos titores e da directora, Begoña Sanjurjo, que agradeceu “a todos os mestres e mestras que estiveron ó voso lado, que transmitiron a identidade do noso cole: saber máis para servir mellor” e ás familias: “grazas pola vosa confianza, o voso apoio e a vosa colaboración constante. A educación é unha tarefa compartida, e os froitos que hoxe celebramos son o resultado do traballo conxunto entre a familia e a escola”.

Ademais a directora do colexio Sagrado Corazón lembroulle ó alumnado: “quixemos acompañarvos no voso crecemento humano e espiritual, axudándovos a descubrir valores que vos acompañarán sempre: o respecto, a solidariedade, a responsabilidade, a honestidade, o esforzo e o amor ao próximo. Queremos lembrarvos que eses valores son un tesouro moito máis valioso que calquera cualificación académica. Ser boas persoas, saber tender a man a quen o necesita, actuar con xustiza e mirar aos demais con respecto será sempre a vosa mellor carta de presentación”. E animounos a “non asustarse ante novos desafíos, que son oportunidades para aprender e mellorar”.