O goberno de Lourenzá xustifica o voto contrario á moción do BNG por “responsabilidade orzamentaria”

Lourenzá, 25 de setembro, 2026. O goberno municipal de Lourenzá aclara as razóns polas que votou en contra da moción presentada pola concelleira do BNG na que se formulaban distintas demandas para a súa inclusión nos próximos orzamentos municipais. Desde o executivo local explican que o voto contrario “non significa estar en contra das actuacións propostas, senón que responde a un criterio de responsabilidade na elaboración dos orzamentos municipais. Non podemos comprometernos a incluír nos orzamentos actuacións ou investimentos que non sabemos se imos poder cumprir. Un orzamento ten que recoller compromisos realistas, acordes cos recursos económicos dos que dispón o Concello e coas posibilidades reais de execución”. Neste sentido o goberno municipal asegura que coincide “en boa medida co obxectivo de varias das demandas formuladas polo BNG, pero considera que nalgúns casos existen vías de financiamento alternativas que permiten acometer esas actuacións sen comprometer innecesariamente os recursos municipais”.

Un dos exemplos é a proposta relativa á adquisición dun vehículo motobomba. A Alcaldía lembra que o Concello de Lourenzá “xa solicitou en varias ocasións á Consellería do Medio Rural a dotación deste vehículo e que a intención do goberno municipal é continuar insistindo por esta vía para conseguir que sexa financiado por outra administración. Consideramos que debemos seguir reclamando á Consellería do Medio Rural este equipamento porque é unha necesidade que coñecemos e que xa trasladamos en varias ocasións. Neste momento as arcas municipais non están en condicións de asumir por si soas o custo que supón a adquisición dun vehículo motobomba, polo que entendemos que o máis responsable é seguir buscando financiamento doutras administracións”. O Executivo considera, polo tanto, que “non sería responsable comprometer no orzamento municipal unha cantidade para esta adquisición cando existe a posibilidade de conseguila mediante unha liña de financiamento ou colaboración doutra administración”.

En relación coa eliminación de barreiras arquitectónicas, o goberno municipal salienta que se trata “dunha das actuacións polas que o Concello xa vén apostando nos últimos anos. A eliminación de barreiras e a mellora da accesibilidade foron incluídas dentro das actuacións vinculadas ás áreas de rehabilitación urbana, destinando partidas a este tipo de intervencións. Como exemplo, a Alcaldía sinala as actuacións realizadas para a adecuación de pasos de peóns e beirarrúas, entre outras intervencións destinadas a facilitar a mobilidade e mellorar a accesibilidade no municipio. Non compartimos a idea de que haxa que presentar agora esta cuestión como se fose algo alleo á acción deste Goberno. Levamos anos traballando na mellora da accesibilidade e seguiremos facéndoo na medida en que os recursos e os programas de financiamento dos que dispoñemos nolo permitan”.
Respecto da petición de incrementar as axudas e subvencións destinadas ás entidades culturais, o goberno municipal destaca que o Concello de Lourenzá “xa mantén unha colaboración constante coas asociacións e colectivos do municipio. Esta colaboración non se limita ás achegas económicas directas senón que inclúe tamén apoio material e a asunción de diferentes gastos vinculados ás actividades que organizan as entidades locais. O Concello colabora coas asociacións culturais durante todo o ano, tanto economicamente como poñendo medios municipais á súa disposición e asumindo custos derivados de moitas das actividades que organizan. É unha colaboración continuada e que queremos manter”.

A Alcaldía tamén explica que “o mesmo sucede no ámbito deportivo. O Concello colabora coas escolas deportivas municipais a través das achegas económicas anuais, pero tamén mediante a posta á disposición das entidades do técnico municipal de deportes, así como a través do financiamento de numerosas actividades deportivas que se desenvolven ao longo do ano. Non se pode valorar o apoio municipal ás entidades deportivas unicamente pola cantidade que figura nunha subvención. O Concello achega instalacións, persoal, medios materiais e financiamento para moitas das actividades que se desenvolven durante todo o ano. Todo iso tamén representa un esforzo económico importante para as arcas municipais”.

O goberno de Lourenzá considera que a elaboración dos orzamentos municipais debe facerse “desde a prudencia, a responsabilidade e a capacidade real de execución, evitando incluír compromisos que posteriormente non poidan materializarse. Compartimos moitas das necesidades que se sinalan na moción, pero unha cousa é estar de acordo cunha finalidade e outra distinta é comprometer unha partida orzamentaria sen ter asegurado que esa actuación se poida executar. Gobernar tamén é priorizar, buscar financiamento e comprometerse co que realmente se pode cumprir”.

O Executivo municipal reitera así a súa disposición a seguir traballando para mellorar os servizos públicos, a accesibilidade, a seguridade, a actividade cultural e deportiva e o apoio ás entidades locais, pero “sempre dentro das posibilidades económicas do Concello e procurando aproveitar todas as vías de financiamento doutras administracións públicas”.