O padroado da Fundación Expomar traballa para que a vindeira edición da feira, que se celebrará do 9 ao 12 de maio de 2019, conte cunha importante participación do sector pesqueiro

Burela, 22 de decembro de 2018. O padroado da Fundación Expomar e a comisión executiva seguen estes días coas súas reunións de traballo encamiñadas a que a vindeira edición da Feira Náutico Pesqueira, que se celebrará entre o 9 e o 12 de maio de 2019, conte cunha importante representación do sector pesqueiro e do mundo do mar.
O presidente da Fundación Expomar e alcalde de Burela, Alfredo Llano, explicou que “nos reunimos o padroado de Expomar e tamén a comisión executiva, para ver como vai a marcha da vindeira edición da Feira Exposición, que se vai realizar o próximo ano do 9 ao 12 de maio. Vemos que evoluciona perfectamente, dado que se está contactando xa con industrias e servizos de empresas de todo tipo que están vinculadas ao sector do mar”.
Llano subliñou: “estamos vendo que a resposta é tremendamente positiva. Todo o mundo quere vir a Burela e supoño que para o ano que ven imos tratar de facer unha boa feira exposición, acompañada dunhas boas xornadas técnicas e dun encontro empresarial. Imos intentar que sexa non soamente unha feira exposición senón que paralelamente haxa diferentes actividades, ensinando como se traballa aquí no sector pesqueiro, que serva para que veña moita xente de fora e poida apreciar Expomar e Burela no seu conxunto”.
O presidente da Fundación Expomar anunciou que “imos ter a próxima reunión xa no mes de xaneiro, calculo que sobre o 16, onde imos ir marcando varias cuestións para definir claramente como vai ser esa nova feira, que cremos que vai ser unha edición importante”.