Dezaoito profesores participaron en Ribadeo na nova fin de semana tecnolóxica organizada por Apaga

Ribadeo, 16 de febreiro de 2019. Dezaoito profesores participaron este sábado en Ribadeo na nova fin de semana tecnolóxica organizada por Apaga (Asociación de Profesores de Automoción de Galicia) e na que se abordou a tecnoloxía do hidróxeno nos vehículos.
Entre os aspectos analizados figuran as distintas aplicacións do hidróxeno en trens, barcos, camións e vehículos pequenos; dos modelos que xa utilizan a pila de hidróxeno; o futuro; as aplicacións nas grandes cidades en autobuses e a comparativa cos vehículos eléctricos.
O presidente de Apaga, Álvaro Doural, dixo que “foi o primeiro encontro deste tipo que celebramos en Ribadeo. No futuro programaranse outras accións para valorar a evolución do hidróxeno como combustible”.
As instalacións do hotel O Cabazo acolleron a celebración desta nova fin de semana tecnolóxica, que foi impartida por persoal do Centro Nacional do Hidróxeno.