O BNG levará á Deputación dúas mocións en relación á xestión dos catamaráns e dos parques de bombeiros

Lugo, 25 de febreiro de 2019. O voceiro do BNG na Deputación anunciou a presentación de dúas iniciativas para o Pleno da Corporación Provincial. Xosé Ferreiro explicou que “tratamos de que os servizos que se pagan dende esta deputación non se convertan en chollos para empresas privadas que aplican sobrecustos e empeoran as condicións de traballadores e do servizo ofertado”.

Nunha das iniciativas, os nacionalistas reclaman que a Deputación recupere a xestión do servizo de catamaráns, “ademais proporémoslle ao Pleno que se investige exhaustivamente todo o proceso de adxudicación e funcionamento da contratación do servizo ao longo do ano 2018” dixo Ferreiro e aclarou “pagar por riba dos 250.000 euros máis por un servizo que está aberto menos tempo, que ten menos rutas, que empeora de xeito moi importante as condicións laborais dos traballadores, existen serias dúbidas da legalidade do proceso de adxudicación” dixo Ferreiro.

Outra das iniciativas do BNG será para pedirlle ao pleno da deputación de Lugo que se esixan as responsabilidades oportunas sobre os posibles incumprimentos dos contrato por parte das empresas adxudicatarias do consorcio de bombeiros. Ferreiro sinalou a existencia dun informe no que se recollen unha serie de incumprimentos e se cuantifican preto de 200.000 euros, quedando outros moitos sen poder comprobarse, recoñecendo ademais que outras cuestións están xa prescritas ou non foron feitas porque a Deputación non as reclamou.