“A Xunta anunciou na última semana un investimento de preto de 2 millóns de euros en Viveiro”, sinala Olano

07 de marzo, 2019. O presidente da xestora do PP de Viveiro, Jaime de Olano, recorda que “a Xunta de Galicia ten anunciado na última semana o investimento de preto de 2 millóns de euros no noso municipio”.

O popular sinala a mobilización de preto de 1,2 millóns de euros en partidas orzamentarias desta anualidade dirixidas a mellorar os portos de Viveiro e Celeiro. Este investimento dirixirase á realización de obras de dragado do porto de Celeiro e do canal de acceso a Viveiro e no interior da dársena das instalacións náutico deportivas; así coma á segunda fase da demolición dos galpóns e acondicionamento da explanada portuaria viveirense. As obras que pretenden mellorar a operatividade nestes espazos foron licitadas este mércores. Unha vez adxudicadas, o prazo de execución das mesmas será de sete meses.

Por outra banda, Olano pon tamén en valor as achegas do Goberno galego para a mellora da estrada LU-161, que conecta Landrove (Viveiro) con Ferreira do Valadouro. Neste caso o investimento será de máis de 430.000 euros e a obra proxectada afectará nun 90% ao termo municipal viveirense.

Ademais, a través da Consellería de Educación, Universidade e Formación Profesional que achegará 175.000 euros para financiar a obra de acondicionamento do antigo colexio de Celeiro para acoller a Escola Oficial de Idiomas.

Deste xeito, “tódolos viveirenses se verán beneficiados este ano, segundo as previsións da Xunta, destas melloras que impulsa o Goberno galego”.