Ciudadanos reclama “avances” na autovía A-74 na Mariña e a conversión do FEVE nun tren de cercanías que vertebre a comarca

 Ribadeo, luns 22 de abril 2019. O candidato de Ciudadanos ao Congreso pola provincia de Lugo, José Manuel Blanco, reclamou esta mañán “avances reais e definitivos” na construción da Autovía A-74 entre Barreiros e San Cibrao, “que PP e PSOE levan décadas prometendo pero da que non hai nin un só quilómetro construido” e a conversión do FEVE nun “verdadeiro tren de cercanías que sirva para vertebrar a comarca da Mariña”.

“As infraestruturas que a comarca da Mariña precisa para o seu desenvolvemento e polas que os mariñaos e mariñás levan décadas agardando pode servir tamén para o despegue definitivo do sector turístico da comarca”, afirmou José Manuel Blanco, que acudiu á Praia das Catedrais xunto a militantes e simpatizantes de Ciudadanos na Mariña.

O candidato de Ciudadanos destacou o “potencial” que a comarca ten desde o punto de vista turístico pero, dixo “son precisas infraestruturas e unha estratexia conxunta e coordinada para poder aproveitalo”.

José Manuel Blanco comprometeu o seu apoio a sectores “vitais” para a creación de emprego na comarca da Mariña: “É necesario garantir o futuro da planta de Alcoa en San Cibrao; axudar ao sector pesqueiro liderado polos portos de Burela e Celeiro; ao sector forestal, que nesta comarca é punteiro; e aproveitar o potencial turístico desta comarca”, resumiu.