O BNG interesase polas “intencións do PP” para a conservación do xacemento de Punta Atalaia en San Cibrao

Nota de Prensa

O BNG INTERESASE NO PARLAMENTO POLAS INTENCIÓNS DO PP PARA A CONSERVACIÓN DESTE XACEMENTO

Os nacionalistas reclaman a conservación in situ do xacemento tal como ditaminara a anterior Dirección Xeral de Patrimonio

Os nacionalistas cren que o Partido Popular esqueceu o que demandaba fai un ano en relación á conservación do Castro da Atalaia

A Mariña, 8 de marzo de 2010. O BNG por medio do parlamentar nacionalista, Fernando Blanco, rexistrou unha iniciativa no Parlamento Galego a fin de que responsábeis da Consellaría de Cultura e Turismo, expliquen cales son as intencións da Xunta de Galiza en relación ao xacemento de Punta Atalaia en San Cibrao, incluído no Inventario de bens da Dirección Xeral de Patrimonio por resolución de 19 de abril de 2007. O BNG interpelará á Consellaría de Cultura e Turismo para saber se mantén as intencións da anterior Dirección Xeral de Patrimonio que pretendía a conservación “in situ” os restos do asentamento prerromano descubertos na zona. Ademais queren coñecer si a Xunta mantén as demandas explicitadas mediante iniciativas presentadas polo parlamentar popular, José Manuel Balseiro, tanto no concello de Cervo como moción, como mediante Proposición Non de Lei, presentada no parlamento, na que instaba á Consellaría de Cultura á compra dos terreos afectados polo xacemento.

Iniciativas para coñecer as intencións da Xunta en relación  á conservación do xacemento

O BNG interesarase polas intencións da Consellaría de Cultura para a protección do Castro da Atalaia tendo en conta que as catas arqueolóxicas ordenadas pola anterior Dirección Xeral de Patrimonio puideran estar a piques de rematar. Os nacionalistas queren saber cal é a posición actual do Partido Popular a respecto deste xacemento e lembraron que as últimas demandas do parlamentar Balseiro fai escasamente un ano, reclamaban a súa compra por parte da administración galega, cando estaba na oposición. A evidencia e numerosos informes técnicos acreditan a importancia do Castro de Punta Atalaia, agora queda por coñecer de que maneira se vai conservar.

O BNG defende a conservación in situ do xacemento en liña coa aposta da anterior Dirección Xeral de Patrimonio.

Os nacionalistas “apostan pola conservación “in situ” e posta en valor do xacemento de Punta Atalaia como elemento cultural de gran valor patrimonial e reclamo turístico de primeiro orde para a vila de San Cibrao e o concello de Cervo”. O portavoz municipal nacionalista, Xoán Estúa, fixo fincapé no feito da existencia deste xacemento “que para si quixeran moitos concellos xa que con este patrimonio conservado e visitábel, a oferta cultural e turística do concello sería veríase incrementada dun xeito relevante”. Para Estúa agora o importante e coñecer cales son os informes emitidos despois das últimas prospeccións arqueolóxicas, si e que estas están rematadas, e cal vai ser a solución que ofrece o actual goberno galego para o Castro da Atalaia.

Críticas ao goberno local por non defender un patrimonio ao que se lle pode sacar un gran beneficio cultural e turístico.

“Estúa criticou a falla de sensibilidade dun goberno municipal que coñecendo a existencia dun ben patrimonial destas características foi capaz de mirar cara outro lado cando corre perigo de destrución, ou da o visto bo a licenzas de construción coñecendo a súa existencia e sen informar a Patrimonio ou ao propio promotor.” Neste sentido, “Estúa lamentou que tiveran que ser os veciños e a oposición municipal quen se puxera á fronte da defensa dun xacemento que o concello negou durante moito tempo, até que as evidencias lles fixeron cambiar o discurso”. Estúa incidiu nas súas críticas ao goberno local que tratou de impedir o inventariado do castro mediante a presentación dun recurso en xuño de 2007.