Di o BNG que a débeda de Cervo é a máis alta de Lugo e a segunda de Galicia con 926 euros por habitante

NOTA DE PRENSA:
A DÉBEDA VIVA POR HABITANTE EN CERVO A 1 DE XANEIRO DE 2010 E A SEGUNDA MAIS ELEVADA DO PAÍS E A PRIMEIRA MAIS ALTA DE LUGO CON 926 EUROS POR HABITANTE

Aos créditos con diferentes entidades crediticias hai que engadir a débeda coa Xunta de Galiza por 1,8 millóns que se empeza a amortizar no 2009 elevando a 4,3 millóns o estado da débeda de Cervo tal como reflexa a liquidación do orzamento 2009

O goberno local despilfarrou en época de bonanza económica e o endebedamento non repercute nin na cantidade nin na calidade dos servizos que o concello ofrece á cidadanía

Cervo, 31 de maio de 2010. O BNG fixo pública a débeda viva do concello de Cervo recollendo os datos publicados polo Ministerio de Economía do conxunto dos concellos de Lugo aos que engadiu os datos da liquidación do orzamento 2009 aprobados en sesión plenaria o pasado 25 de marzo. Para os nacionalistas resulta lamentábel que o concello de Cervo figure como o concello mais endebedado da provincia de Lugo e o segundo de Galiza en relación ao seu número de habitantes. O BNG considera lamentábel o estado financeiro do concello cando esta situación non repercute na cantidade e calidade dos servizos que reciben os veciños e veciñas do concello, e mais ben son produto dunha xestión económica dedicada ao despilfarro en época de bonanza económica que agora quere facer pagar á cidadanía os erros de xestión do Partido Popular.

4,34 millóns de débeda para 4685 habitantes que sitúan ao concello no segundo posto de Galiza e no primeiro da provincia en débeda por habitante

Os 4.340.599 millóns de euros que o concello de Cervo adebeda a diferentes entidades dan como resultado en relación ao número de habitantes censados 926 euros de débeda por habitante que sitúa ao concello de Cervo non segundo posto entre os concellos mais endebedados de Galiza e o primeiro da provincia de Lugo, en cifras absolutas a débeda de Cervo solo e superada polos concellos de Lugo e Viveiro na provincia de Lugo que multiplican o seu número de habitantes. Para o portavoz municipal nacionalista Xoán Antón Estúa García, “o goberno local leva anos sen atender as recomendacións dos servizos de intervención sobre contención do gasto e chegamos a onde chegamos, os cuantiosos ingresos por taxas de construción dos últimos anos non se aproveitaron para amortizar débedas e fíxose todo o contrario, acudiuse ao crédito con períodos de carencia que agora empezamos a pagar ”

O endebedamento non se traduce nin na cantidade nin na calidade dos servizos que se prestan á cidadanía

Para o BNG o endebedamento da administración local debe traducirse no incremento na prestación de servizos á cidadanía, tanto en cantidade como en calidade, “algo que non se produce no caso de Cervo”. Os nacionalistas insisten en que Cervo non e un concello pobre en ingresos xa que ten unha importante capacidade de recadación derivada especialmente da multinacional ALCOA, “outra cousa e que teñamos os peores xestores incapaces conter e priorizar o gasto, e dispostos a seguir derrochando recursos como sucede coa proposta de remodelación da parcela do Rivera Casás”. Agora despois de baixar do pedestal de novos ricos aplican un plan económico financeiro para a recuperación económica que chega tarde e pretende facer pagar á cidadanía os erros do goberno mediante a subida xeneralizada de impostos directos e indirectos que non ten repercusión na mellora e incremento dos servizos.

Tódalas operacións de endebedamento con concertacións de crédito a medio e longo prazo e os seus períodos de carencia foron decididas polo goberno municipal do PP, este e o anterior.

Por último os nacionalistas quixeron facer fincapé na acusación ao goberno municipal do PP sobre as responsabilidades desta situación, para Estúa, “nada do que sucede ten outros responsábeis que non sexan os actuais e anteriores gobernantes do PP xa que todas as operacións de endebedamento son responsabilidade do actual e anterior goberno do PP”.