Lugo, 23 de xullo de 2021. A Xunta de Goberno aprobou este venres o convenio de colaboración co Concello da Fonsagrada a través do que a Deputación de Lugo aportará 35.750€ para a redacción do proxecto das obras de construción do polígono industrial. Así o informou a voceira socialista do Goberno, Pilar García Porto, que explicou que “hoxe demos un paso moi importante para cumprir cunha demanda histórica dos veciños e veciñas e do tecido empresarial deste municipio da montaña”.
García Porto anunciou que este convenio será asinado polo Presidente da Deputación, José Tomé Roca, e o Alcalde, Carlos López, a próxima semana para, “xa de seguido, sacar a contratación os traballos de redacción do proxecto”.
A Deputada avanzou que a institución provincial tamén se encargará deste procedemento de licitación, “dentro do noso compromiso de máxima colaboración cos concellos para sacar adiante servizos e infraestruturas necesarias para a veciñanza e para o tecido produtivo, como é o caso do polígono industrial da Fonsagrada”.
A voceira socialista lembrou que, a maiores desta achega para a redacción do proxecto, a Deputación de Lugo xa ten comprometidos outros preto de 600.000€ para acometer as obras deste polígono. “Un compromiso que está plasmado nun protocolo de colaboración que foi asinado o ano pasado polo Presidente desta institución e polo Alcalde”, apuntou Pilar García Porto, quen engadiu que segundo este protocolo o Concello da Fonsagrada achegará case 150.000€ para as obras.
Pilar García Porto subliñou que, “como ocorre con tantos outros servizos e infraestruturas da provincia, sen o apoio económico da Deputación de Lugo, A Fonsagrada non podería contar cun parque empresarial, unha dotación imprescindible, coa que cremos que debe contar como concello, pero tamén como cabeceira de comarca, para reforzar o seu papel como polo de desenvolvemento económico, social e laboral, capaz de xerar un efecto multiplicador na zona”.
300.000€ para unha nova liña de axudas para o rural
A Xunta de Goberno tamén sacou adiante o Programa para a Dotación e Mellora de Servizos Comunitarios, que conta cunha dotación económica de 300.000€. “Trátase dunha nova liña de axudas de concorrencia competitiva que lanzamos dende a Deputación de Lugo para entidades asociativas da provincia co obxectivo de colaborar na mellora da calidade de vida dos veciños e veciñas do rural”, explicou Pilar García Porto.
O Goberno aprobou ha reunión de hoxe as bases do programa, que sairán publicadas nos vindeiros días no Boletín Oficial da Provincia (BOP), data a partir da cal se abrirá o prazo para solicitar as subvencións.
Poderán optar a estas axudas, que oscilarán entre os 1.000 e os 6.000€, entidades asociativas, tales como asociacións e agrupacións de veciños e veciñas, comunidades de usuarios e usuarias de augas, comunidades de montes ou asociacións de gandeiros, agricultores ou produtores forestais da provincia para realizar investimentos en inmobles ou para equipamentos que sirvan para mellorar a calidade de vida e fomentar e dinamizar o asociacionismo veciñal.
Entre as actuacións subvencionables, García Porto enumerou: a mellora, adecuación do firme ou sinalización de vías públicas comunais e os seus accesos; as obras de acondicionamento, reforma e ampliación dos locais nos que a entidade desenvolve a súa actividade; adquisición de equipamentos para os locais que resulten necesarios para o funcionamento común da entidade; obras novas de mellora, reforma e reparación das infraestruturas e instalacións das traídas de augas comunitarias, promovidas por comunidades de usuarios de augas; construción de depósitos de auga comunitarios ou acondicionamento e recuperación dos existentes, así como das súas captacións, canalizacións e acometidas; e obras de acondicionamento e recuperación de espazos públicos comunais, fontes comunais e a súa contorna.
A voceira recalcou que con este novo programa, que estaba incluído nos Orzamentos deste 2021, “queremos seguir reforzando a cooperación co tecido social da provincia”. “Son cantidades que non teñen unha gran entidade económica, pero si unha gran relevancia social para mellorar o día a día da xente. Está claro que ninguén quere vivir nun lugar se non ten os servizos que necesita, e isto é precisamente o que queremos con este programa: dotar de máis e mellores servizos ó noso rural para fixar poboación”, explicou García Porto.
Poxa pública de 55 parcelas nos polígonos de Chantada e Castroverde
A Xunta de Goberno tamén aprobou o procedemento para o alleamento de 55 parcelas situadas nos polígonos industriais de Castroverde e Chantada, que, extinguida Suplusa, xestiona agora directamente a Deputación de Lugo. Trátase de 44 parcelas no parque empresarial de Castroverde e de 11 no de Chantada. A venta das parcelas farase a través dun procedemento de concorrencia pública mediante a celebración dunha poxa.
Mudanza ao Fogar de Santa María
A Xunta de Goberno tamén aprobou a adxudicación do contrato para a prestación do servizo de mudanza e traslado de diferentes servizos da Deputación de Lugo ao Fogar de Santa María, despois das obras de rehabilitación acometidas nos pavillóns 1 e 2.
A empresa que resultou adxudicataria é International Movers, SL, por un importe de 41.400€. O contrato inclúe o traslado do equipamento, mobiliario, documentación, arquivos, utensilios e pertenzas, así como a montaxe e desmontaxe do mobiliario e do equipamento necesario, e a súa posterior colocación no Fogar de Santa María.
Segundo explicou García Porto, a previsión é que o traslado -que inclúe os servizos provinciais de Recadación, Asistencia aos Concellos, Medio Ambiente, Formación e Asistencia Xurídica- comece en agosto. A duración dos traballos non debe superar os 2 meses, a excepción do servizo de Recadación, para o que o prazo é dunha semana, por tratarse dun servizo con necesidades especiais.
Gas natural nos centros de atención a maiores
Outro dos asuntos aprobados na Xunta de Goberno foi a adxudicación do contrato de subministro de gas natural para os centros de atención a maiores que a Deputación de Lugo ten en funcionamento en Trabada, Pol, A Fonsagrada, Castroverde e Pedrafita, e tamén para os próximos que se porán en marcha en Navia de Suarna e Ribas de Sil. O adxudicatario é Repsol Butano SA e o importe do servizo é de 126.215€ para un período de 9 meses, entre setembro deste ano e xuño do ano 2022.
Alí salientou o papel que desenvolve este evento no impulso dos produtos agroalimentarios de proximidade, ao tempo que favorece as canles curtas de comercialización. Destacou tamén a importancia deste mercado, considerado como un dos máis antigos da provincia de Lugo, xa que ofrece unha ampla mostra dos principais oficios de artesáns da Idade Media. Ademais, permite aos asistentes gozar de actividades variadas e degustar produtos agroalimentarios diversos.
Baixo o título Memoria de mariñáns. Unha crónica da emigración da Mariña, o xornalista e investigador Martín Fernández Vizoso ofrecerá unha intervención centrada nas historias e vivencias dos emigrantes da comarca, ilustrando o fenómeno migratorio que marcou a vida de moitas familias ao longo do século XX. O evento inclúe tamén unha imaxe histórica de mariñáns retornados de América nos anos 30, que serve de fío visual para contextualizar esta realidade.
En total foron ofertadas preto de 80 prazas de surf, piragüismo e vela, destinadas a nenas e nenos con idades comprendidas entre os 9 e os 15 anos. As escolas desenvolvéronse en diferentes quendas nos meses de xuño e xullo. O concelleiro de Deportes, Francisco José Silvent, subliñou “a importante participación da rapazada ribadense nas escolas deportivas de verán, que organizamos desde o Concello de Ribadeo coa axuda dos clubs que as impartiron. Queremos agradecer ás familias a confianza depositada nas nosas actividades, que lles serviron aos asistentes para practicar deporte na auga e para pasar uns días aprendendo e perfeccionando técnicas”.
No encontro mantido na sede da delegación territorial da Xunta en Lugo, no que tamén estivo o director territorial da Consellería, Marco Antonio Fernández Piñeiro. abordáronse liñas de cooperación para a mellora de Infraestruturas e de seguridade viaria, de interese para este municipio. O departamento que dirixe M. Allegue segue prestando apoio aos municipios para executar actuacións que contribúan a mellorar a calidade de vida da veciñanza e a reforzar a competitividade económica.
A mostra sobre Mimina, que repasa a súa traxectoria vital e artística e o seu papel esencial na creación de Sargadelos como empresa cultural, amplía o seu período de apertura até o 12 de agosto grazas á cesión das instalacións por parte do Concello de Cervo. A exposición poderá visitarse todos os días de 12:00 a 14:00 e de 17:00 a 20:00, e tamén se poden concertar visitas noutros horarios ou para grupos chamando ao 636020514 (Lucía).
