A participación do Presidente neste evento prodúcese tras o interese mostrado xa polo Goberno de España no modelo público de residencias da Deputación como unha medida eficaz fronte ao reto demográfico, que garante o benestar dos residentes e das súas familias, favorece o arraigo, e crea emprego e actividade económica no territorio
Lugo, 27 de maio de 2022. O Presidente da Deputación de Lugo, José Tomé Roca, foi o único representante dunha institución provincial en España convidado polo Presidente do Goberno, Pedro Sánchez, ao acto de presentación do Proxecto Estratéxico para a Recuperación e Transformación Económica (PERTE) de Economía Social e dos Coidados, celebrado este venres na Moncloa, por ser un referente na atención ás persoas maiores.
José Tomé coñeceu de primeira man as claves do PERTE específico para desenvolver os sectores vencellados ao coidado das persoas, precisamente un dos eixos de traballo prioritarios da Deputación.
A participación de José Tomé neste evento prodúcese despois do interese mostrado xa polo Goberno de España no modelo público de residencias que ten implantado a institución lucense en pequenos concellos rurais da provincia como unha medida eficaz fronte ao reto demográfico, que garante o benestar e a tranquilidade dos residentes e das súas familias, favorece o arraigo, e crea emprego, sobre todo feminino, e actividade económica no territorio.
O modelo provincial de asistencia aos maiores tamén espertou interese en Europa, pois a Deputación xa participou en dúas ocasións na Semana Europea de Rexións e Cidades, o maior evento de política rexional que se celebra en Bruxelas, para explicar a iniciativa.
O Presidente da Deputación manifestou a súa gran satisfacción porque o Goberno de España poña a mirada no modelo asistencial da Deputación “como unha estratexia de impulso da economía social e dos coidados, que é innovadora, coa que estamos demostrando moi bos resultados e que pode ser útil para outros territorios”.
Puxo en valor o Presidente que, en sintonía co PERTE presentado hoxe, o modelo de xestión provincial é 100% público, polo que pon ás persoas no centro da atención. “O noso único obxectivo é ofrecer os mellores coidados ós maiores. Aquí non existe, nin se busca, ningunha rendibilidade económica, só social. As nosas residencias son fogares, onde os maiores forman novas familias”, engadiu.
Durante o acto celebrado hoxe na Moncloa, o Presidente do Goberno incidiu en que a política dos coidados debe ser un dos piares da recuperación económica para España e anunciou que o PERTE de Economía Social e dos Coidados, que será aprobado o vindeiro martes no Consello de Ministros, mobilizará en torno aos 800M€. Sinalou Pedro Sánchez que os proxectos se executarán progresivamente ata o ano 2026 e que se fomentará a incorporación de financiamento privado adicional de inversións responsables e sostibles.
A economía social representa a día de hoxe o 10% do PIB do país e o 12,5% do emprego, o que supón 2,2 millóns de postos de traballo en 43.000 empresas.
Os PERTE son proxectos de carácter estratéxico postos en marcha dende o Goberno de España e que contan cunha gran capacidade de arrastre no crecemento económico, o emprego e a competitividade da economía española. Ata o momento xa se aprobaron PERTEs relacionados co desenvolvemento do vehículo eléctrico, a saúde, enerxías renovables, cadea agroalimentaria ou a industria naval, entre outros.
A Vicepresidenta Segunda e Ministra de Traballo e Economía Social, Yolanda Díaz, inaugurou o acto celebrado hoxe, ao que asistiron tamén a Vicepresidenta Primeira e Ministra de Asuntos Económicos e Transformación Dixital, Nadia Calviño; o Ministro de Agricultura, Pesca e Alimentación, Luis Planas; o Ministro da Presidencia, Relacións coas Cortes e Memoria Democrática, Félix Bolaños; a Ministra de Política Territorial e Portavoz do Goberno, Isabel Rodríguez; a Ministra de Sanidade, Carolina Darias; a Ministra de Dereitos Sociais e Axenda 2030, Ione Belarra; a Ministra de Igualdade, Irene Montero, e o Ministro de Inclusión, Seguridade Social e Migracións, José Luis Escrivá. Así mesmo, acudiron representantes dos axentes sociais e económicos do país, e do tecido asociativo e cooperativo.
A rede de residencias da Deputación
Mostra da intensidade do traballo que desenvolve a Deputación para cumprir cos compromisos cos concellos en materia de residencias é que, só no que vai de mandato, abriu catro novos centros de maiores, na Fonsagrada, Castroverde, Pedrafita do Cebreiro e Meira, que se suman aos tres que xa estaban en marcha, en Trabada, Ribadeo e Pol. Ademais, neste ano a institución ten previsto abrir as residencias de Ribas de Sil e Navia de Suarna, co que a finais deste mandato, serán un total de 9 os centros de maiores da rede pública da Deputación en funcionamento. Así mesmo, continúa traballando no resto de proxectos, como os da Pontenova, Portomarín, Guitiriz, Becerreá, A Pobra do Brollón, Ourol, Cervantes, Folgoso do Courel e Ferreira de Pantón.
A rede de residencias da Deputación de Lugo está baseada nun modelo que prima a atención, case personalizada. Cada centro conta con prazas para unha media de 30 persoas, que son atendidas por 25 traballadores e traballadoras, cunhas instalacións confortables e plenamente adaptadas ás necesidades dos maiores.
Dez minutos antes das 21:30 horas do xoves, o 112 Galicia foi informado polo persoal de Adif dun tren detido no medio dun túnel en Mogor, Mañón, debido a unha chapa metálica no medio da vía. Así, aínda que as doce persoas que viaxaban a bordo estaban ilesas, precisaban medios de rescate para baixalas do convoi e desprazalas ata o apeadeiro máis próximo. Nestas tarefas colaboraron a Garda Civil, os Bombeiros do Eume, o GES de Ortigueira e os voluntarios de Protección Civil de Mañón. Finalmente, as persoas foron rescatadas e evacuadas a outro tren, que as levou ata o apeadeiro sen maiores complicacións. Desde alí, continuaron a súa viaxe en taxi.
Competirán durante tres días xunto a outras dezaseis escolas de todo o mundo, elaborando catro propostas de pizza: Polbo á galega, con polbo galego, queixo San Simón e allada picante; Bosque galego, con crema de castañas e mel picante; Terra meiga, con zorza picante; e Rapadoira, con setas, queixo azul e pera. As estudantes viaxan acompañadas pola súa profesora, Conchi Carreiras, coa que levan tempo preparando as receitas. Esta é a terceira participación do IES de Foz neste certame, no que xa acadaron un segundo posto en edicións anteriores. A actividade forma parte do programa Erasmus+ da FP, financiado pola Unión Europea, que facilita a participación do alumnado en competicións de habilidades profesionais por toda Europa.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
Ás 15:15 horas deste martes, un particular solicitou asistencia sanitaria tras a caída dun raio no lugar de Castro de Igrexa (Cazás, Xermade). Varias persoas sentiron os efectos da descarga eléctrica e unha delas quedou atolada. Tras dar aviso ao Servizo de Urxencias Sanitarias de Galicia-061, Garda Civil e Protección Civil, a persoa afectada foi evacuada consciente ao Hospital Universitario Lucus Augusti.
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas.
Co sol ocultándose e a lúa asomando entre as torres de Donlebún, o músico e divulgador reivindicou o poder evocador e transformador do bravú fronte á morriña paralizante. Na sala de lectura da biblioteca, Souto explicou a evolución do rock bravú no imaxinario galego, evocando as músicas populares que acompañaron durante décadas os remolques dos pascualiños e os labores comunitarios, e lembrando a vitalidade de grupos como Skornabois, Diplomáticos de Monte Alto, Xenreira, Zënzar, Pinto de Herbón ou os Rastreiros. A boa lembranza da súa anterior visita levou ao artista a pechar a velada interpretando o “Himno de Ribadeo”, composto por Arturo Mogo, nun final cheo de afecto pola vila e pola súa identidade cultural.
A viaxe, enmarcada no proxecto «Relevo Xeracional: O Futuro do Mar» e organizada en colaboración co GALP Itsas Garapen Elkartea, permitiu achegarse a iniciativas como Kofradia Basque Seafood, a Escola de Pesca de Ondarroa, AZTI, Albaola ou o Itsas Museo de Donosti, así como a proxectos vinculados directamente á actividade pesqueira e á divulgación, incluíndo o uso de realidade virtual. O intercambio con Euskadi permitiu coñecer modelos que combinan formación, investigación, transmisión do coñecemento e modernización do sector, contribuíndo a identificar novas vías para facilitar a incorporación da mocidade á actividade pesqueira e garantir a continuidade das comunidades costeiras galegas.
