A Confederación Hidrográfica do Cantábrico acomete a limpeza en 2,3 km do río Ferreiravella, en Riotorto

A subdelegada e o presidente informaron que dende 2019 o investimento da Confederación Hidrográfica do Cantábrico en labores de restauración na provincia supera os 1,2 millóns de euros

Riotorto, 19 de outubro 2022. A subdelegada do Goberno en Lugo, Isabel Rodríguez, destacou hoxe o investimento de máis de 445.000 euros que achega este ano a Confederación Hidrográfica do Cantábrico para traballos de limpeza, conservación e mantemento das canles nos ríos na provincia de Lugo. Fíxoo durante unha visita ao concello de Riotorto para supervisar, xunto ao presidente da CHC, Manuel Gutiérrez, e ao alcalde, Clemente Iglesias, as actuacións que está a desenvolver a Confederación Hidrográfica na canle do río Ferreiravella, no entorno do Mazo.

A subdelegada e o presidente informaron que dende 2019 o investimento da Confederación Hidrográfica do Cantábrico en labores de restauración na provincia supera os 1,2 millóns de euros, “enmarcados no compromiso do Goberno de realizar un traballo continuado na extensa rede hidrográfica que xestiona, máis de 2.500 quilómetros en Lugo, atendendo ás demandas e necesidades dos concellos e veciñanza”, subliñou Rodríguez.

Nesta liña, avanzaron que as actuacións levadas a cabo teñen como obxectivo mellorar e manter o bo estado das contornas fluviais e previr, na medida do posible, desbordamentos en tramos con obstrucións ou de capacidade hidráulica reducida. Nestas zonas realízanse retiradas de restos vexetais (tocos, ramas, troncos, etcétera), talla e poda de árbores en perigo de caída ou o acondicionamento dos áridos causantes dos taponamentos.

A subdelegada considerou fundamentais estas actuacións de restauración fluvial e protección dos ríos da provincia, “porque reducen o risco e perigo de inundacións, ao tempo que permiten unha mellor xestión do territorio”.

Dentro das intervencións realizadas o pasado ano pola Confederación Hidrográfica do Cantábrico destacan as destinadas a mellorar a continuidade dos leitos mediante a eliminación de obstáculos que impiden o movemento e a dispersión dos organismos que deterioran a calidade do medio natural, seguindo as directrices da Directiva Marco da auga e a lexislación española en materia de auga.

En todos os casos en que foi necesario, realizáronse previamente traballos orientados a minimizar os impactos na fauna como a pesca eléctrica e o rescate de anfibios, para o seu traslado a outras zonas, seguindo as directrices e recomendacións autonómicas e coordinando cos responsables municipais e os veciños das zonas de traballo.

Traballos no río Ferreiravella
Durante a visita, a subdelegada, o presidente e o alcalde comprobaron os traballos que está a realizar a Confederación Hidrográfica ao longo de 2,3 quilómetros do río Ferreiravella, na parroquia do Mazo. Concretamente, as actuacións consisten na retirada de árbores e restos vexetais acumulados en diferentes tramos do leito, na talla de árbores secas, enfermas ou con risco de caída, así como a poda da ramaxe intensiva e arbustiva que diminúe a sección de desaugadoiro do leito.

Estas actuacións, que contan cun orzamento de 14.700 euros, lévanas a cabo a empresa pública Tragsa dentro do Programa de mantemento e conservación de leitos que desenvolve a Confederación Hidrográfica do Cantábrico fóra das zonas urbanas, nas que os labores de conservación e mantemento de leitos son competencia dos concellos de acordo con establecido na Lei 10/2001 do Plan Hidrolóxico Nacional.