Os premios entregaranse o vindeiro 1 de decembro na Cidade da Cultura co obxectivo de dar visibilidade ao traballo dos GALP e animar a novos promotores a que presenten proxectos para impulsar o sector e preservar o patrimonio marítimo e costeiro
Noia (A Coruña), 4 de novembro de 2022. A directora xeral de Desenvolvemento Pesqueiro, Susana Rodríguez, presentou hoxe no Museo do Mar de Noia a terceira edición dos Premios Economía Azul, uns recoñecementos cos que se pretende galardoar os mellores proxectos sustentables das zonas costeiras de Galicia postos en marcha ao abeiro das axudas para iniciativas dos grupos de acción local do sector pesqueiro (GALP). Os premios contan con catro categorías -apoio á pesca costeira artesanal, creación de emprego, diversificación e economía circular- ás que aspiran 12 proxectos, tres por cada unha delas.
A representante da Consellería do Mar explicou que os 12 finalistas foron seleccionados por unha comisión da Dirección Xeral de Desenvolvemento Pesqueiro entre as propostas presentadas polos GALP tendo en conta os beneficios que xeraron para o sector pesqueiro e a súa área de influencia. Estre os aspectos considerados están a súa contribución á creación de emprego nas zonas costeiras, o reforzo da identidade, a cultura e o patrimonio local así como os elementos innovadores introducidos e a creación de oportunidades para as mulleres e a mocidade no sector marítimo-pesqueiro.
Susana Rodríguez expuxo que agora se abre o proceso de votación pública para a elección dos proxectos gañadores polo que calquera persoa pode votar desde hoxe e ata o vindeiro 25 de novembro na páxina web https://galp.xunta.gal/. Poderase votar a un proxecto dos finalistas en cada unha das catro categorías e resultará gañadora a candidatura que reciba máis votos. As iniciativas premiadas anunciaranse o 1 de decembro nunha gala que se celebrará no Museo Centro Gaiás da Cidade da Cultura, en Santiago de Compostela.
A directora xeral de Desenvolvemento Pesqueiro salientou que estes galardóns van dirixidos ás entidades e persoas promotoras de proxectos subvencionados ao abeiro das estratexias de desenvolvemento local participativo dos GALP. Con eles, dixo, búscase dar visibilidade ao labor destes grupos na dinamización das zonas do litoral e animar a potenciais promotores a que presenten novas iniciativas coas que impulsar o sector marítimo-pesqueiro e preservar o patrimonio costeiro de Galicia.
Balance dos GALP
Un exemplo da súa importancia son os máis de 660 proxectos desenvolvidos desde a súa creación no ano 2016 a finais do ano pasado. Estas iniciativas recibiron máis de 38 millóns de euros de axudas cofinanciadas polo Fondo Europeo Marítimo e de Pesca (FEMP) que supuxeron un investimento global de máis de 80 millóns de euros. A actividade económica xerada por estas accións permitiu aportar máis de 230 millóns de euros á economía galega, preto dun 0,4% do produto interior bruto (PIB) de Galicia, e a creación de máis de 4.600 empregos directos e indirectos.
A categoría de apoio á pesca costeira artesanal, incluído o marisqueo a pé, está dirixida a proxectos que aborden novas canles de comercialización, impulsen o valor dos produtos pesqueiros, favorezan o aproveitamento das especies menos coñecidas, promovan a oferta de produtos de proximidade así como solucións para o uso dos descartes.
En canto á creación de emprego, na selección tivéronse en conta as iniciativas que estimulan a economía das zonas costeiras, reforzan o seu atractivo desenvolvendo servizos de alta calidade, forman ás persoas e promoven o emprendemento no sector marítimo-pesqueiro.
A categoría de diversificación atende a proxectos que avalían novas actividades, a vinculación entre a pesca e o turismo, o impulso do turismo pesqueiro e o fomento e aproveitamento do patrimonio cultural vencellado co mar. Mentres, na de economía circular ponse o foco na reutilización, reparación e reciclaxe de materiais empregados nas actividades do sector pesqueiro así como o deseño de produtos que empreguen materiais que minimicen os residuos e a contaminación.
Os proxectos finalistas desta terceira edición son:
Ao premio a mellor proxecto de apoio á pesca costeira artesanal:
1. Narón emprende en azul. Concello de Narón (GALP Golfo Ártabro Norte).
2. Mellora do proceso produtivo do polbo de lonxa. Confraría de pescadores de Lira (GALP Seo de Fisterra Ría de Muros-Noia Costa Sostible).
3. Acondicionamento do espazo da lonxa de Portonovo para a mellora do uso turístico e comercial implantando novas tecnoloxías – enLonxaTour. Confraría de Pescadores de Portonovo (GALP Ría de Pontevedra).
Ao premio a mellor proxecto de creación de emprego:
1. Pazo de Trasariz Seafoof Events. Trasariz Desarrollo Inmobiliario SL (GALP Costa da Morte).
2. Seafood Market Mama Celia. Manuel Cartamil Obelleiro (GALP Seo de Fisterra Ría de Muros-Noia Costa Sostible).
3. Produción de algas comestibles das Rías Baixas galegas. H.Q. Seaweed SL (GALP Ría de Vigo-A Guarda).
Ao premio a mellor proxecto de diversificación:
1. Creación da aula do mar A Mariña. Asociación de Saúde Mental A Mariña (GALP A Mariña – Ortegal).
2. Restaurante Material: O Abrigo do Nordés. Nordés Material SL (GALP Costa da Morte).
3. Pescaturismo Praia de Sanxenxo. Sauro Martínez Durán (GALP Ría de Pontevedra).
Ao premio a mellor proxecto de economía circular:
1. Centro de transformación do lixo mariño. Asociación de mulleres do sector pesqueiro Seo de Fisterra e Ría de Muros-Noia (GALP Seo de Fisterra Ría de Muros-Noia Costa Sostible).
2. Amegrove Coida o Mar – Amecomar. Amegrove Sociedade Cooperativa Galega (GALP Ría de Arousa).
3. Fabricación de produtos con materiais reutilizados e residuos procedentes da manufactura. Nordés Veleria SL (GALP Ría de Pontevedra).
Pasadas as 13:30 horas deste luns, o 112 Galicia tivo constancia, a través de Urxencias Sanitarias de Galicia-061, dun ciclista que se atopaba en parada cardiorrespiratoria no quilómetro 1 da LU-151, á altura da parroquia de Fazouro. De inmediato, os xestores do Centro Integrado de Atención ás Emerxencias solicitaron a colaboración dos axentes da Garda Civil de Tráfico e da Policía Local de Foz. Malia os esforzos, os profesionais sanitarios só puideron confirmar o falecemento da persoa.
A variada oferta de produtos de artesanía e de alimentación de temporada e proximidade á venda complementouse con degustacións de minihamburguesas de carne de raza Limiá e empanada de carne de porco celta e tenreira de raza Caldelá, que se repartiron gratuitamente entre as peroas que fixeron algunha compra no Mercadiño.
Os cortes produciranse do punto quilométrico 2,800 ao final da vía. Habilitaranse desvíos alternativos que estarán debidamente sinalizados.
Cada participante pode presentar unha única fotografía, en papel e formato dixital, seguindo as bases dispoñibles na web da Deputación. A celebración do aniversario inclúe actividades como a Xornada de Degustación da Tenreira de Ancares, unha xornada micolóxica e un obradoiro de rescate na montaña, ademais doutras propostas ambientais e divulgativas nos próximos meses.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
Competirán durante tres días xunto a outras dezaseis escolas de todo o mundo, elaborando catro propostas de pizza: Polbo á galega, con polbo galego, queixo San Simón e allada picante; Bosque galego, con crema de castañas e mel picante; Terra meiga, con zorza picante; e Rapadoira, con setas, queixo azul e pera. As estudantes viaxan acompañadas pola súa profesora, Conchi Carreiras, coa que levan tempo preparando as receitas. Esta é a terceira participación do IES de Foz neste certame, no que xa acadaron un segundo posto en edicións anteriores. A actividade forma parte do programa Erasmus+ da FP, financiado pola Unión Europea, que facilita a participación do alumnado en competicións de habilidades profesionais por toda Europa.
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas.
