Xunto á Deputación de Lugo, adheríronse hoxe a esta rede colaborativa o Principado de Asturias e as deputacións de Tarragona, Ourense, Castellón, Guadalaxara, Palencia e Burgos, sumando xa un total de 20 entidades de todo o territorio nacional
Lugo, 11 de abril de 2025. O Presidente da Deputación de Lugo, José Tomé Roca, e a Vicepresidenta Terceira do Goberno de España e Ministra para a Transición Ecolóxica e Reto Demográfico, Sara Aagesen Muñoz, asinaron este venres en Ponferrada o protocolo para impulsar un Centro de Innovación Territorial en Lugo. Esta iniciativa permitiralle á provincia formar parte da Rede CIT que impulsa o Goberno de España co obxectivo de xerar ferramentas que activen os territorios en vías de despoboamento.
“Isto vainos a permitir participar, co resto de deputacións de España, nunha acción que servirá para promover todo tipo de proxectos innovadores destinados a reter talento no territorio e dinamizar o rural”, valorou o mandatario provincial. Xunto á Deputación de Lugo, esta mañá asinaron este protocolo na Térmica Cultural de Ponferrada o Principado de Asturias e as deputacións de Tarragona, Ourense, Castellón, Guadalaxara, Palencia e Burgos, sumando un total de 20 entidades de todo territorio nacional.
Esta firma enmárcase nun encontro nacional de Centros de Innovación Territorial que se celebra ata mañá, sábado, no Bierzo co obxectivo de fomentar a colaboración entre territorios, impulsar o intercambio de ideas e estratexias. Unha cita na que participan 400 inscritos e consta dunha feira con expositores, mesas redondas, espazos de traballo, concertos e obradoiros.
Precisamente, Tomé Roca participou nunha mesa redonda sobre Desenvolvemento Rural e compromiso social na que sinalou que na Deputación de Lugo “levamos anos traballando para facer políticas destinadas a acercar os servizos ao rural” e destacou o traballo da institución provincial para crear unha rede pública de residencias de maiores “que favorecen o arraigo cunha atención de calidade e crean emprego, os nosos piares na loita contra o despoboamento”.
Puxo en valor que a Deputación de Lugo ten xa 9 residencias en funcionamento –nos concellos de Pol, Trabada, Ribadeo, A Fonsagrada, Castroverde, Pedrafita do Cebreiro, Meira, Navia de Suarna e Ribas de Sil- que dan servizo na provincia a través dun modelo de pequenos centros públicos, nos que prima a atención ás persoas, e que conta con moi boa acollida en Europa. Así mesmo, a institución provincial traballa co compromiso de abrir este mandato as de Becerreá, Guitiriz e a Pontenova e traballa noutros proxectos en Portomarín, A Pobra do Brollón, Ourol, Cervantes, Folgoso do Courel e Pantón.
O Presidente sinalou outros proxectos e boas prácticas que impulsa a Deputación que contribúen a fixar poboación, como o Plan Deputación de Cooperación cos Concellos –que permite que un pequeno municipio como Negueira de Muñiz (con 225 habitantes) reciba 180.000€- a Granxa Gayoso Castro ou iniciativas turísticas como as rutas en catamarán ou o Parque Central de Antas que impulsan un modelo de colaboración público-privado. Ademais Tomé Roca reivindicou unha revisión do financiamento local para que as entidades locais teñan uns medios acordes as súas competencias e sinalou o principal papel das deputacións: ser o Concello dos concellos.
Unha rede en constante crecemento
“Estas firmas son unha demostración do noso compromiso cos municipios rurais, seguiremos traballando para que todos os territorios teñan acceso á Rede CIT. Somos cada vez máis e seguiremos crecendo”, destacou Aagesen. Explicou a Ministra que a Rede CIT,yu conformada por todos estes Centros de Innovación Territorial e cuxo centro de coordinación é o Nodo CIT MITECO-CIUDEN –situado en Ponferrada, León- busca conxugar esforzos e optimizar as estratexias para o desenvolvemento rural.
José Tomé acudiu a este acto acompañado polo Deputado de Promoción Económica e Social, Pablo Rivera Capón. Xuntos participaron co resto de autoridades nun percorrido pola feira, asistiron á intervención inaugural da Ministra e participaron na mesa redonda sobre desenvolvemento rural e compromiso social na que participaron tamén a Directora Xeral de Políticas contra a Despoboación, Ángeles Marín; e a Presidenta da Deputación de Palencia, Ángeles Armisén. No encontro tamén estivo presente o Secretario Xeral para o Reto Demográfico, Francés Boya, que no 2021 visitou o Centro de Atención a Maiores que a Deputación de Lugo ten en Castroverde, para coñecer de primeira man o modelo da institución provincial.
Adultos, nenos, familias, grupos de amizades fixeron o percorrido nun día espectacular de sol e cunha temperatura de 26º á hora da saída. Acudiron á cita o presidente provincial da AECC, José Manuel Rozas, o alcalde de Ribadeo, Dani Vega, as concelleiras e concelleiro ribadenses, Marta Saiz, Begoña Sanjurjo, Elena Sierra e Francisco José Silvent, a presidenta e o xerente de Acisa, Carmen Cruzado e Jesús Pérez, así como representantes da AECC de Ribadeo coa súa presidenta, Tea Martínez, á cabeza. A II Andaina Ribadeo en marcha contra o cancro contou co patrocinio de Solán e Acisa Ribadeo e coa colaboración do Concello de Ribadeo, Eroski e 2M.
Pasada a medianoite, un vehículo saíuse da vía na N-634. Como consecuencia do impacto, tres persoas resultaron feridas. Da asistencia sanitaria ocupáronse os profesionais de Urxencias Sanitarias de Galicia-061 e os axentes da Garda Civil de Tráfico da seguridade na vía. Os Bombeiros de Barreiros tamén acudiron, sen embargo, ningún dos feridos estaba atrapado.
Baixo o título “A guerra en Oriente Medio. Do xenocidio en Palestina á agresión a Irán”, o analista internacional Duarte Correa ofrecerá unha intervención centrada na evolución do conflito, o impacto humanitario e as implicacións xeopolíticas da escalada bélica na rexión.
A proba, organizada polo CP Altrúan, reunirá 137palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García achegouse esta tarde a Ribadeo para presentar a proba, que comezará ás 15.30 coa saída dos prebenxamíns e benxamíns. A continuación e de forma escalonada, desenvolveranse as probas das categorías infantil, alevín e cadete e xuvenil.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
A Garda Civil de Burela tomou declaración este 10 de xuño a unha representante do departamento en liña de Porcelana de Sargadelos, que denunciou unha estafa na que se emprega a imaxe da empresa para enganar clientes. Segundo explicou, desde finais de abril están a aparecer páxinas web falsas con descontos do 80% e perfís fraudulentos en redes sociais como Instagram, TikTok e Facebook, a través dos que varios usuarios xa foron estafados. A compañía presentou denuncias contra distintos dominios e contas, das que só unha continúa activa, e achegou tamén os rexistros da marca e as comunicacións realizadas ante Meta. A denuncia foi formalizada no cuartel da Garda Civil de Burela, onde quedou incorporada ás dilixencias abertas polo corpo.
