A conselleira do Medio Rural visitou o complexo turístico Cabañas do Mar, en Foz, impulsado polo Grupo de Desenvolvemento Rural Terras de Miranda

Foz, 11 de abril de 2025. A conselleira do Medio Rural, María José Gómez, acompañada pola directora xeral da Axencia Galega de Desenvolvemento Rural, Paz Rodríguez; e polo delegado territorial da Xunta en Lugo, Javier Arias, realizou unha visita esta tarde ao complexo turístico Cabañas do Mar do concello lucense de Foz.

Durante o seu percorrido polas instalacións, a conselleira explicou que esta iniciativa foi impulsada polo Grupo de Desenvolvemento Rural (GDR) Terras de Miranda, que opera nesta contorna, a través dun orzamento de 155.658 euros procedentes do programa Leader. Gómez louvou os beneficios desta medida, que ten “unha repercusión moi positiva sobre o tecido socioeconómico das zonas rurais”, xa que coa súa xestión contribúese a mellorar as condicións para fixar poboación e crear e manter emprego no rural.

O programa Leader conta cun orzamento de 56,9 millóns de euros ata 2027. Deste investimento, 17,6 millóns están destinados aos gastos de funcionamento, polo que con este montante os Grupos de Desenvolvemento Rural poderán dispoñer dos medios humanos e materiais necesarios para desempeñar as súas funcións de dinamización territorial. Os 39,6 millóns de euros adicionais serán para as operacións a terceiros que se executarán a través das liñas de axudas que convoquen os GDR.

Así, María José Gómez destacou o positivo balance do anterior período Leader, cando a medida estaba incluída no Programa de Desenvolvemento Rural (PDR) de Galicia 2014-2020, que permitiu aprobar máis de 1.500 proxectos, consolidar máis de 4.000 empregos e crear uns 1.100 novos. Mobilizáronse máis de 169 millóns de euros, cunha axuda pública de 77,5 millóns de euros para operacións a terceiros.