O Burela FS dáse un festín de goles diante do Gran Canaria FSF Teldeportivo (11-4)

Cris Lourés e Emilly lideraron a goleada laranxa con tres goles cada unha

Burela, 9 de maio, 2025. O Burela FS impúxose con moita autoridade ao Gran Canaria FSF Teldeportivo (11-4), nun encontro valedoiro para a vixésimo oitava xornada da Primeira Iberdrola FS. As burelistas demostraron desde o primeiro segundo a diferenza de nivel entre os dous persoais -as canarias xa descenderon de forma matemática- e asoballaron durante moitos minutos do encontro ás de Cristina Gimeno.

O primeiro tempo foi un auténtico monólogo do conxunto local, que encerrou ás canarias no seu campo e someteu a un asedio constante á porta de Vero, que sufría para taponar a sangría de oportunidades que había sobre o seu marco. A primeira en avisar foi Emilly cun potente disparo no minuto 2 e no 4 xa chegaría o primeiro da noite, nos pés de Cris Lourés, que non desaproveitaba un balón no segundo pau para bater á porteira amarela. A de Narón volvía ver porta poucos segundos máis tarde cando superaba de novo a Vero cun bo disparo cruzado.

O Burela non baixou o ritmo a pesar dos goles e no minuto 7 Cami atopábase coa madeira nun lanzamento desde uns 9 metros. Mentres, o primeiro achegamento visitante chegaba no minuto 9 a través dun tiro desde a distancia de Myrielen que blocaba sen problemas Ana Eliza. Terían a súa mellor ocasión as de Cristina Gimeno tres minutos máis tarde, nun man a man de Colado que taponaba moi ben Ana Eliza. Antes, Cris Lourés tivera o terceiro do seu equipo e da súa conta particular nun lanzamento moi perigoso que despexaba Vero.

No 12 chegaría o terceiro das mariñás a través de Emilly. A mellor do mundo recibía nunha boa posición dentro da área e non perdoaba cun disparo axustado que pegaba no pau e íase para dentro. O cuarto, tamén obra de Emilly, non tardaría en chegar tras un roubo na área contraria de Patricia, que cedía para que anotase a da Ilha das Valadares.

O asedio laranxa seguía cun disparo cruzado de Dinha que se atopaba co pau e non perdoaba despois a brasileira cun tiro que se lle coaba entre as pernas a Vero. A tres minutos do descanso apostaba Teldeportivo polo xogo de cinco con Unami de porteira-xogadora e esta decisión taponaba un pouco a sangría de oportunidades a favor do cadro local. Unami, con todo a favor soa no segundo pau, tivo o primeiro para as insulars, pero o seu remate foise ao lateral da rede. Xusto antes do descanso, a seis décimas do bocinazo final, chegaba o sexto das locais, nun disparo parabólico desde campo propio de Antía Pérez.

A segunda entrega tamén foi dominada amplamente polas mariñás e as grancanarias, que seguiron apostando por xogar con porteira-xogadora durante varias fases do período, aproveitaron o tramo final para maquillar un pouco o resultado e irse de Vista Alegre con varios tantos na súa marcadora particular.

Cris Lourés marcaba o seu terceiro tanto para facer o 7-0 no minuto 23 e despois Débora atopábase co pau e Ana Eliza volvía desbaratar un man a man de Paola. Foi o preludio do primeiro tanto visitante, nun balón en longo de Vero que cabeceaba Paola adiantándose a Ana Eliza. No minuto 28 chegaba o 8-1, nun disparo axustado ao pau dereito de Noelia Montoro, e o 9-1 era obra de Emilly, que remachaba a pracer tras un rexeite de Vero ante un disparo de Patricia. Un minuto máis tarde facía o décimo Dinha coando o balón entre as pernas de Vero. O último da conta local anotábao Patricia no minuto 35, logo dunha recuperación en cancha propia e marcar a porta baleira. Unami, de doblepenalti, e Myrelen, en dúas ocasións, anotaban tres tantos para as canarias no últimos tres minutos de xogo e maquillaban deste xeito un pouco o resultado final de 11-4.

Ficha Técnica Burela FS 11-4 Gran Canaria FSF Teldeportivo

Burela FS (11): Ana Eliza; Cris Lourés, Dinha, Emilly, Patricia -quinteto inicial-, Carolina Pedreira, Débora, Cilene, Cami, Antía Pérez e Noelia Montoro.

Gran Canaria FSF Teldeportivo (4): Vero; Idoya, Paola, Ra, Myrielen -quinteto inicial-, Collado, Unami, Sydorenko e Virginia.

Goles: 1-0, min. 4: Cris Lourés. 2-0, min. 5: Cris Lourés. 3-0, min. 12: Emilly. 4-0, min. 13: Emilly. 5-0, min. 14: Dinha. 6-0, min. 20: Antía Pérez. 7-0, min. 23: Cris Lourés. 8-1, min. 28: Noelia Montoro. 9-1, min. 33: Emilly. 10-1, min. 34: Dinha. 11-1, min. 35: Patricia. 11-2, min. 37: Unami. 11-3, min. 37: Myrielen. 11-4, min. 40: Myrielen.

Árbitros: Luis Álvarez Botas e Daniel Díaz-Faes Rojo (Colexio Asturiano). Amoestaron ás locais Dinha e Cris Lourés, así como á visitante Paola.

Incidencias: Encontro da vixésimo oitava xornada disputado no pavillón de Vista Alegre ante uns 600 espectadores. Nos prolegómenos do encontro foi homenaxeado o conxunto local pola consecución da Copa Galicia e da Copa da Raíña. O cadro visitante fíxolle o corredor ás burelesas e posteriormente a alcaldesa da localidade, Carmela López, fíxolle entrega a Dany dun obsequio conmemorativo para a entidade. Así mesmo, o tenente de alcaldesa, Mario Pillado, entregoulle a Cris Lourés unha réplica da Copa da Raíña que recibiron ao final do partido todas as xogadoras da plantilla laranxa e o seu corpo técnico.