No taboleiro do Estado español, o Eixe Mediterráneo leva anos xogando con vantaxe. Xogan en bloque, planifican a longo prazo, ocupan espazos de poder e, sobre todo, non teñen medo a poñer o puño enriba da mesa. Valencia, Cataluña, Murcia e Andalucía oriental fan lobby con descaro, con método e sen complexos. Mentres tanto, Galicia, Asturias, Cantabria e Euskadi baixan a cabeza, cada quen na súa guerra pequena, entregados á lóxica dun Estado que os trata como paisaxe de fondo e obviando Portugal.
Xa non se trata só de quen leva as autovías, os AVEs ou os fondos europeos. O que está en xogo é moito máis: quen lidera a transición industrial, quen marca a política enerxética, quen define os nodos loxísticos, quen ten dereito ao futuro e quen queda como reserva simbólica. E a resposta é clara por parte do governo: non é o norte quen esta a liderar.
Temos industria, pero non temos voz.
O norte da Península xera enerxía, transforma materias primas, produce alimentación, pesca e compoñentes para medio mundo. Desde os estaleiros de Ferrol ata os centros tecnolóxicos de Xixón e Euskadi, desde os portos de Bilbao e Vigo ata os parques eólicos e a madeira de Lugo ou a leite de Vilalba, todo ese potencial existe, pero está ausente da política de investimentos do Estado e da súa planificación.
Onde está o tren de mercadorías entre A Coruña e Europa? Onde está o AVE real a Asturias? Onde están os accesos ferroviarios aos portos de Vigo, Coruña, Ferrol, Xixón ou Santander? Onde está a conexión industrial de Galicia co Cantábrico? Está nos caixóns. Porque aquí non temos lobby. Porque aquí os nosos políticos non fan o seu traballo.
Os cargos do PSOE: cómplices do centralismo
A situación sería distinta se os cargos do Partido Socialista en Galicia, Asturias, Cantabria ou Euskadi se comportasen como verdadeiros representantes territoriais. Pero non o son. Son intermediarios do Goberno, non defensores da terra que os elixiu. Son políticos que aplauden investimentos para o Corredor Mediterráneo mentres calan ante o abandono do norte.
Cando foi a última vez que un ministro ou secretario de Estado do PSOE ou Sumar, plantou cara ao Consello de Ministros para reclamar investimentos estruturais para o noso eixe atlántico-cantábrico? Nunca. Están máis preocupados por manter o cargo que por defender o territorio. E isto hai que dicilo alto e claro: son cómplices do abandono.
Non chega con facer notas de prensa ou visitas guiadas polos concellos. O que fai falta é rebeldía política. Disidencia interna. Capacidade de presión real. O que fan os cargos do PSOE no norte é grave: defender á Moncloa en vez de defender ás súas comarcas. Esa lealdade mal entendida está condenando ao noso tecido produtivo á irrelevancia.
Fronte ao Mediterráneo, un norte mudo e dividido
O Corredor Mediterráneo leva décadas construíndo influencia. Levan os investimentos europeos, os grandes contratos e a hexemonía política do relato territorial. Fan política con mapas, cifras e presión. Aquí, no norte, temos todo o que Europa di que valora —territorio, enerxía limpa, capacidade industrial, biodiversidade, fronteira atlántica— e non temos nada porque non temos forza organizada.
Non se trata de crear comisións. Trátase de actuar. De sumar vontades entre gobernos autonómicos, portos, universidades, cámaras de comercio e sociedade civil para impoñer o dereito a existir como eixe político e económico. Pero iso non vai ocorrer mentres os deputados, senadores e cargos socialistas e podemitas do norte sigan agachados, domesticados, covardes. Que fai a Vicepresidenta?
É agora ou nunca
Galicia e o norte peninsular están nun punto de non retorno. Ou organizamos un lobby atlántico-cantábrico de verdade, sen pedir permiso, ou aceptamos que os fondos, as industrias e a influencia seguirán indo cara o sur e o leste. Ou nos rebelamos, ou quedamos como reserva paisaxística de España, cun parador, unha autopista sen saída e un AVE que leva a Madrid pero non a Europa.
Non queremos privilexios. Queremos equilibrio. Queremos presenza. Queremos futuro.
Pero para iso hai que facer algo máis que calar.
Juan Carlos Piñeiro Docampo
Sº XERAL DE CxG
MEMBRO DA DIRECCIÓN DO PARTIDO DEMOCRATA EUROPEO
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
