Mariña Gueimunde lamenta “que María Loureiro ataque aos funcionarios do Concello de Viveiro para xustificar a súa propia neglixencia como alcaldesa”

«É lamentable, irresponsable e infantil que unha alcaldesa que estivo rexentando un Concello como o de Viveiro durante máis dunha década non se dea conta de que lle fan un requirimento», argumentou, en referencia á petición de Augas de Galicia para desbloquear o proxecto da Xunqueira

Viveiro, 15 de maio de 2025. O Concello de Viveiro levou ao pleno desta semana a expropiación forzosa das parcelas da área da Xunqueira con motivo do proxecto construtivo de melloras estruturais para minimizar o risco de inundacións no río Fontecova. Este proxecto, segundo explicou a alcaldesa Mariña Gueimunde, estaba paralizado desde o 13 de novembro, data desde a que o Concello de Viveiro –entón gobernado polo bipartito do PSOE e do BNG– non fixera nada referente ao denominado plan de Melloras estruturais para a reducción do risco de inundación da ARPSI fluvial ES014-LU-170101 Río Fontecova. Viveiro (Lugo).

O mencionado 13 de novembro, Augas de Galicia requirira ao Concello de Viveiro que remitise o certificado do pleno do Concello no que se adoitaran a conformidade co proxecto da obra e o compromiso de recibir as obras e asumir o seu mantemento e conservación; tamén, a certificación acreditativa da dispoñibilidade dos terreos que o Concello poría a disposición de Augas de Galicia para a súa expropiación, e a certificación acreditativa do resultado do proceso de información pública e, no seu caso, do informe da contestación ás alegacións presentadas. Pero o anterior equipo de Goberno non enviou a documentación solicitada.

Para xustificar a neglixencia, o PSOE de Viveiro escudouse en que «o expediente non estivo paralizado e Augas de Galicia non volveu reclamar nin demandar a documentación pendente». Mariña Gueimunde lamentou que «o convenio do proxecto da Xunqueira asinouno a alcaldesa, que debería saber desde o primeiro minuto cales eran as súas obrigas e as tramitacións que se deberían levar a cabo desde o Concello». «O requirimento enviado o ano pasado estaba dirixido á alcaldesa de Viveiro, que naquel intre era a señora Loureiro. E é lamentable que unha alcaldesa pense que, despois de asinar un convenio, polo seu esquecemento, vanlle volver a requirir», engadiu.

Máis grave é que, segundo manifestou de xeito contraditorio o PSOE de Viveiro, «Augas de Galicia remitiu un requirimento que, por un erro interno, non se rexistrou nin en Alcaldía nin en Secretaría, motivo polo cal o goberno municipal non tivo coñecemento do mesmo». Ao respecto desta acusación, Mariña Gueimunde puntualizou que «é lamentable, irresponsable e infantil que unha alcaldesa que estivo rexentando un Concello como o de Viveiro durante máis dunha década non se dea conta de que lle fan un requirimento. É un sinal claro de que non está cumprindo coas obrigas dun convenio que ela mesma asinara. É desolador que a señora Loureiro ataque aos funcionarios para xustificar a súa propia neglixencia».

Mariña Gueimunde explicou que «cando algo chega por rexistro ao Concello de Viveiro, derívase aos departamentos correspondentes. Este, en concreto, derivouse aos de Medio Ambiente e Obras, nos que deducimos que Míriam Bermúdez, que era a socia de María Loureiro no goberno, tampouco se decatou de que chegara o requirimento ou, como a comunicación entre elas non era fluída, non falaron do tema. E os prexudicados foron, unha vez máis, os veciños de Viveiro».

A alcaldesa Mariña Gueimunde lembroulle a María Loureiro que, para coñecer a evolución dos proxectos, «non hai nada máis que navegar nos expedientes. Cando un entra na plataforma que nós utilizamos, tense acceso a eles. Podería ter información deste en concreto só con teclear “Fontecova Xunqueira”. Pero, insisto, agora queren responsabilizar aos funcionarios, cando son elas dúas, a señora Bermúdez e a señora Loureiro, as que teñen a responsabilidade política e as que se agochan detrás de escusas baleiras para xustificar a súa apatía e inacción».