Ribadeo, 21 de xuño de 2025. Esta fin de semana, do 20 ao 22 de xuño, terán lugar en Ribadeo as xornadas de exaltación da ameixa. Están organizadas por Acisa en colaboración Vicepresidencia da Deputación de Lugo. Na cita participan 21 locais hostaleiros asociados.
A presidenta de Acisa, Carmen Cruzado, contou que “esta fin de semana en Ribadeo, terán lugar as xornadas gastronómicas de exaltación da ameixa, nas que participan 21 locais hostaleiros asociados a Acisa, que van ofrecer tapas e pratos preparados con este produto do noso mar. As diferentes elaboracións poderán atoparse nas redes sociais de Acisa a partir de hoxe, para a súa consulta e así coñecer as propostas de cada local. Os locais participantes son: O Indiano, La Solana, Parador de Turismo, Ramonita, Barallocas, O Lar de Manolo, Náutico, A Horta de San Roque, Aware Cakes, El Rincón del Gordo, La Flor de Jose, Mesón D´Cata, O Furancho no Camiño, Cayo Coco, Marinero, A Mirandilla, Arrancadeira, Los Dulces de Delphine, San Miguel, La Bugalla e La Quinta. As propostas nestas xornadas son moi variadas, poderemos saborear fabas con ameixa, arroz meloso con ameixa, pratos variados de ameixas á mariñeira, en salsa verde, á prancha, á sartén, tostas de ameixas, polbo con ameixas,… tanto en formato tapas como en racións”.
O xerente de Acisa, Jesús Pérez, declarou: “grazas á colaboración da Vicepresidencia da Deputación de Lugo puidemos desde Acisa organizar esta nova cita repartindo 250 quilos de ameixa xapónica galega gorda, que se traduce nunhas 12.000 unidades deste bivalvo, que distribuímos entre os bares, mesóns e restaurantes que participan nestas xornadas sen ningún tipo de custe para eles, ademais de 5.000 manteis individuais de papel. Cada local recibe 12 quilos de ameixa, adquirida a un provedor local, que é asociado de Acisa”.
E engadiu: “esta é xa a sexta vez que desde Acisa regalamos materia prima para a elaboración das tapas e dos pratos ás nosas asociadas e asociados, co obxectivo de aforrarlles custes nalgunhas das campañas que lles propoñemos. Ademais queremos botar unha man e axudar á dinamización do sector hostaleiro nestas datas previas ao verán, a piques de dar comezo a tempada alta, e poñer en valor un produto como a ameixa, aproveitando que son os días mais grandes do ano, cun plan gastronómico inigualable, ofrecendo unha alternativa aos ribadenses e á veciñanza doutras localidades da Mariña e do Occidente asturiano así como aos turistas que xa nos visitan nestas datas. Agardamos desde Acisa que sexa unha fin de semana de moito movemento en Ribadeo”.
A presidenta de Acisa subliñou que “para esta actividade percibimos da Área de Mar da Deputación de Lugo unha achega de 8.000 euros, que lle queremos agradecer expresamente, xa que nos permite seguir a traballar na entrega de materia prima gratuíta para a celebración de xornadas gastronómicas, que teñen un gran éxito e acollida tanto entre os negocios locais participantes como entre a súa clientela. Esta directiva iniciou esta liña de traballo no ano 2022 e así agardamos seguir coa axuda de administracións públicas, entidades e patrocinadores”.
Pérez Prada dixo: “queremos contribuír á concienciación da importancia de consumir produtos do mar, de proximidade e de procedencia galega, por saúde e por sabor e da necesidade de facer pobo entre todas e todos. Desde Acisa queremos agradecer a colaboración e o apoio da Área de Mar da Deputación de Lugo, que foi vital para poder celebrar esta actividade”.
Presidenta e xerente agardan que “estas xornadas sexan un éxito ao igual que o foron as da lura, as da merluza de Burela, as da cabala ou as do peixe espada”.
Toda a información sobre as propostas dos 21 locais participantes pode atoparse na web e nas redes sociais de Acisa.
Baixo o título “A guerra en Oriente Medio. Do xenocidio en Palestina á agresión a Irán”, o analista internacional Duarte Correa ofrecerá unha intervención centrada na evolución do conflito, o impacto humanitario e as implicacións xeopolíticas da escalada bélica na rexión.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
A Garda Civil de Burela tomou declaración este 10 de xuño a unha representante do departamento en liña de Porcelana de Sargadelos, que denunciou unha estafa na que se emprega a imaxe da empresa para enganar clientes. Segundo explicou, desde finais de abril están a aparecer páxinas web falsas con descontos do 80% e perfís fraudulentos en redes sociais como Instagram, TikTok e Facebook, a través dos que varios usuarios xa foron estafados. A compañía presentou denuncias contra distintos dominios e contas, das que só unha continúa activa, e achegou tamén os rexistros da marca e as comunicacións realizadas ante Meta. A denuncia foi formalizada no cuartel da Garda Civil de Burela, onde quedou incorporada ás dilixencias abertas polo corpo.
O deputado galego Francisco Millán Mon explicoulles o día a día da súa actividade nesta cámara e a importancia da Unión Europea para Galicia e viceversa. Desde a dirección do centro agradecen “a súa exposición e o trato dispensado ao alumnado e profesorado desprazado a Bruxelas”. Neste 2026 cúmprense 40 anos da adhesión de España á Comunidade Económica Europea, así se denominaba naquel momento. O IES de Ribadeo é Escola Mentora do Programa Escolas Embaixadoras do Parlamento Europeo.
Foi unha xornada máxica na que a música e a convivencia se deron a man nunha contorna única. Os instrumentos de corda encheron de melodías os xardíns do centro, creando unha atmosfera especial que emocionou ao público asistente e puxo en valor o talento e a ilusión da mocidade. A alcaldesa de Cervo, Dolores García Caramés, non quixo perderse esta cita tan especial e desfrutou da tarde xunto ás persoas usuarias, e o persoal do centro. Durante o encontro, agradeceu o convite e felicitou á organización por promover actividades que fomentan a cultura, a inclusión e os espazos de encontro entre a veciñanza.
A mostra, aberta na sala de exposicións do Auditorio Municipal de luns a venres entre as 18:00 e as 22:00 horas, reúne preto de 30 obras de artistas emerxentes e consolidados, ofrecendo diversas miradas sobre a paisaxe, a identidade, a memoria e a realidade contemporánea. A alcaldesa, Marta Rouco, destacou o valor de que Vilalba forme parte desta programación compartida e o impacto positivo que supón para a actividade cultural local.
