O PP defenderá no pleno que a Deputación se implique na defensa dos lucenses en necesidades básicas como o ciclo da auga e a mobilidade

Os deputados populares defenderán que a Deputación colabore técnica e economicamente con tódolos Concellos da provincia, de forma igualitaria, na xestión do ciclo da auga, ademais de asinar convenios, especialmente supramunicipais, financiando actuacións para dotar de servizos de abastecemento de auga e saneamento nos distintos municipios da provincia

Lugo, 29 de setembro de 2025. Os deputados do Grupo Provincial Popular defenderán no pleno de mañá que a Deputación de Lugo se implique na defensa e dotación de servizos básicos aos lucenses, tales como o acceso á auga potable e á mobilidade.

O voceiro provincial popular, Antonio Ameijide, explica que, nunha das mocións, pedirase que a Deputación de Lugo cumpra coas funcións que lle corresponden de cooperar cos Concellos e garantir a prestación de servizos municipais. “A Deputación está para axudar a todos os municipios polo que entendemos que debe colaborar nunha materia imprescindible para os veciños e veciñas como o ciclo da auga”, sinalou.

A petición que defenderán os deputados populares consiste en que a Deputación colabore técnica e economicamente con tódolos Concellos da provincia, de forma igualitaria, na xestión do ciclo da auga, así como asinar convenios, especialmente supramunicipais, financiando actuacións para dotar de servizos de abastecemento de auga e saneamento nos distintos municipios da provincia.

Actuacións que corresponden por lei á Deputación de Lugo e que deben de ser similares ás realizadas pola Xunta de Galicia nos Concellos de Ribadeo e Trabada, onde o goberno autonómico convenios para a mellora do abastecemento.

Por outra banda, o Grupo Provincial do Partido Popular tamén defenderá a unidade de toda a corporación para impedir a desconexión de Lugo e Galicia da mobilidade nacional e internacional instando ao Goberno de España a elaborar e impulsar un Plan integral de investimentos e mellora da mobilidade na comunidade e na provincia.

Antonio Ameijide lembra que á desconexión de Lugo da alta velocidade, o mal estado das infraestruturas viarias na provincia, autovías sen rematar… hai que sumar agora a perda de conexións aéreas dende Galicia. “Semella que queren dar a puntilla a Galicia, pero especialmente a Lugo”, denunciou.

Neste senso, o voceiro popular afirmou que “basta xa” de que PSOE e BNG “sigan a permitir este abandono sistemático a Lugo en materia de infraestruturas”. “O Goberno de Sánchez tiña unha folla de ruta marcada para illar á nosa provincia por terra, mar e agora pretende sumar o illamento por aire”, criticou.

ROGOS E PREGUNTAS

Os deputados populares tamén preguntará no pleno pola situación das obras de renovación da cuberta do Pazo dos Deportes “que tiñan que estar rematadas o pasado 11 de agosto, uns traballos que a día de hoxe van pola metade e que de non rematar antes do vindeiro 12 de outubro poñen en risco que o Breogán poida xogar o seu primeiro partido como local esta temporada”.

Tamén se preguntará pola situación das obras dos centros de atención a maiores de A Pontenova e Guitiriz que están paralizados.

Por outra banda, os deputados populares tamén defenderán dous rogos para que o goberno provincial de PSOE e BNG mellore a seguridade na estrada provincial LU-P-6602, ao seu paso pola parroquia de Galdo (Viveiro), habilitando zonas seguras para o paso de peóns e elementos redutores da velocidade, entre outras medidas, ademais de solicitar a instalación de xeradores eléctricos en todos os centros de atención a maiores da Deputación de Lugo para garantir o subministro enerxético no caso de que se produzan apagamentos ou cortes no subministro eléctrico.