“O BNG non pode avalar a deixadez crónica dun goberno que se ve obrigado por segunda vez este ano a recorrer á vía excepcional do extraxudicial”
Foz 19 de novembro de 2025. Este pasado venres os concelleiros do BNG foron convocados a unha reunión no Concello, para explicar os pormenores do suplemento de crédito e do recoñecemento extraxudicial de crédito que vai a pleno este mes de novembro, por un importe total de 1.321.877,16 €. Nesa reunión onde o alcalde e a concelleira de facenda presentaron a documentación, participaron os catro concelleiros do BNG e contaron tamén coa presenza do interventor municipal.
“Dada a gravidade do que se pretende que aprobemos, decidimos convocar unha asemblea local do BNG de Foz este luns pasado”, explican.
“Dende o goberno municipal estase facendo unha xestión dos recursos da veciñanza de Foz dunha forma moi irresponsable e cunha falta de capacidade de diálogo co resto de grupos políticos sen precedentes. Non se pode gobernar como se se tivera maioría absoluta sen tela, pois as consecuencias acaban por pagalas terceiras persoas”.
“Durante o que vai de ano preguntamos en varios plenos polo avance na elaboración dos orzamentos municipais, cómpre recordar que estamos cos orzamentos prorrogados do ano 2024, tamén levamos preguntando en sucesivas ocasións polo pago das subvencións ás entidades culturais e deportivas pendentes do ano 2023. As respostas sempre foron evasivas e pouco claras”.
“Desde o BNG non imos comulgar con rodas de muiño. Se o equipo de goberno quere que se paguen as subvencións ás entidades de Foz e quere que se paguen as facturas pendentes dos anos 2023 e 2024 a provedores e empresas, o que ten que facer e traelo a pleno sen mesturalo todo para despois intentar someternos a unha chantaxe moral”.
“Neste expediente orzamentario mestúranse asuntos totalmente distintos: facturas pendentes do ano 2023 e 2024 con reparos de Intervención, pago de subvencións nominativas pendentes do exercicio 2023, modificación do importe de subvencións nominativas do ano 2025, aportación do concello a distintos convenios e investimentos e facturas do exercicio 2025 pendentes de pago por falta de liquidez nas partidas. Destas últimas non temos ningún tipo de información agás o importe total”.
“O BNG non pode avalar a deixadez crónica dun goberno que se ve obrigado por segunda vez este ano a recorrer á vía excepcional do extraxudicial”.
“No mes de abril xa se tramitou outro Recoñecemento Extraxudicial de Crédito de 809.915.63 €. Intervención emite un Reparo Suspensivo por omisión da fiscalización previa dos gastos, que cualifica como unha infracción moi grave na Lei de Transparencia e Bo Goberno. O noso voto en contra é o aval legal para a advertencia do Interventor”.
“O informe sobre a Modificación de Crédito tamén é desfavorable, advertindo dun risco de incumprimento da estabilidade orzamentaria en 2025 ao financiar gastos con remanente”.
“Toda esta situación é consecuencia directa de que o Concello de Foz está cos orzamentos prorrogados, que non existe unha planificación seria, e a ollos vista, non hai a capacidade nin vontade para facelo”.
“O lóxico sería que a estas alturas do ano xa se tiveran aprobados os orzamentos municipais para o ano 2026, para que puideran entrar en vigor o día 1 de xaneiro, non é así, polo menos dende o BNG non tivemos novas ao respecto”.
“Ao mesmo tempo non houbo ningún tipo de comunicación nin achegamento previo, a xestión a base de imposicións e a total falta de diálogo é pouco decorosa e é moi desleal coa veciñanza de Foz”.
Por todo isto, o BNG votará en contra da Modificación Orzamentaria e do Recoñecemento Extraxudicial tal e como se presentan, “estamos a favor de axudarlle ao goberno a emendar as súas chapuzas e garantir que todo o mundo poida cobrar, pero con rigor, con seriedade, e dende logo, dende a legalidade”.
“Así mesmo, instamos ao Alcalde e ao seu equipo de goberno a facer os deberes e a poñerse a traballar para elaborar uns orzamentos para 2026, para que entre outras moitas cousas, que esta situación non se volva dar dentro duns meses”.
“A responsabilidade disto recae única e exclusivamente no goberno do Concello de Foz, pola súa mala xestión e por tratar de chantaxear á oposición coa debilidade e necesidade económica de quen está agardando por estes pagos”.
“Estamos dispostos a votar favorablemente algúns destes puntos por separado, pero non a totalidade do conxunto”, conclúen.
Dezaoito locais hostaleiros de Ribadeo, Rinlo e Vilaframil ofrecerán diversas preparacións ata o vindeiro domingo: en escabeche, en salpicón, en empanada, ao allo, á prancha, en albóndega, etc… Todas as propostas poden consultarse nas redes sociais de Acisa Ribadeo, que agradece “unha vez máis o apoio da OPP do Porto de Burela, que nos doou 90 quilos de cabala para estas xornadas, produto que entregamos de xeito gratuíto aos locais participantes. Achegámoslles así unha parte do peixe que empregarán nesta nova cita gastronómica na que tamén colabora o Concello de Ribadeo”. Ata o porto, ao restaurante Marinero, se achegaron este mediodía o director territorial da Consellería de Mar, Alexandre Piñeiro, as concelleiras ribadenses Montse Seijo, Elena Sierra e Begoña Sanjurjo, a presidenta de Acisa, Carmen Cruzado, o xerente do colectivo empresarial, Jesús Pérez, e o técnico de Acisa, Jorge Fernández, que puideron degustar as elaboracións realizadas por este establecemento hostaleiro.
Durante a xornada Lionel compartirá a súa experiencia no mundo da escrita, dando a coñecer os seus procesos creativos e as temáticas que caracterizan os seus libros. O acto incluirá un coloquio participativo cos asistentes do club onde poderán preguntar e intercambiar opinións co autor sobre o libro lido “A raíña das velutinas”.
Ao longo desta semana, máis de 40 científicas, divulgadoras, xornalistas e activistas participan nunha campaña simultánea en todo o Estado para achegar á cidadanía as consecuencias que os recentes ataques a Irán poden ter na vida cotiá. No marco desta iniciativa, celebrarase en Ribadeo un acto informativo o venres 17, na Escola Municipal de Música, ás 19:00 horas. Toda a información sobre o No Normal Tour está dispoñible en: 
O sábado terá lugar no Casino o III Showcooking, con cociña en directo e maridaxe de viños. O público poderá votar os seus pinchos favoritos e participar no sorteo dunha noite no hotel Marqués de Riscal. A entrega de premios será o luns 20 ás 19:00 h. O Concello e Destino Navia animan a veciños e visitantes a gozar desta cita gastronómica.
Haberá degustación diaria de ostras na carpa do porto. Concertos, showcookings, visitas guiadas e actividades mariñeiras. Lancha pola ría, exposición de maquetas e concurso fotográfico #somoslasostra2026, ademais propostas especiais en Acueo, La Casilla e Restaurante Peñalba.
A etapa, cun percorrido duns 150 quilómetros, partiu arredor das 11:30 horas e rematou en Barreiros, atravesando concellos como Xermade, Muras, Viveiro ou Foz. A proba reúne a equipos do ciclismo profesional internacional e sitúa a provincia de Lugo como escenario dunha das citas deportivas máis destacadas do calendario. O Goberno colabora no desenvolvemento da carreira a través das Forzas e Corpos de Seguridade do Estado, que velan polo correcto desenvolvemento da proba e pola seguridade de participantes e afeccionados.
O acto está organizado pola A.C. Francisco Lanza e contará coa participación de Dores Fernández Abel, en representación da entidade, xunto co autor da obra. Duarte Correa xa visitara Ribadeo no ano 2022 para ofrecer unha charla sobre a situación política internacional, centrada daquela na guerra de Ucraína. Nesta nova ocasión, o público poderá volver seguir a súa capacidade de análise e síntese, que lle permitirá ofrecer unha visión actualizada dun contexto xeopolítico en constante transformación.
