Nico, primeira fichaxe de inverno do Reyco Burela FS

O internacional estadounidense provén do SD Xove e xa adestrou co equipo burelense durante a primeira volta da tempada

Burela, 29 de decembro, 2025. Nicholas López Castro (Miami, Estados Unidos, 19/06/02) chegou a España con 3 anos, residiu en Madrid e posteriormente en Lugo; desde os 11 anos vive en Burela e formou parte das Escolas Deportivas laranxas. Provinte do SD Xove FS, o á internacional é xogador habitual da selección absoluta de EE.UU., pasando polo Praias de Barreiros na tempada 22/23, na que se marchou a Italia fichando por o Villacidrese C5 (Serie C1) e máis tarde por o Spes Poggio Fidoni (Serie B) e o Ciampino Futsal (Serie A) na 23/24. Volve a España na 24/25, tempada na que se incorpora ao SD Xove FS (2ªB).

O mozo de 23 anos súmase ao novo proxecto de Juanma Marrube, despois de adestrar en numerosas ocasións co plantel laranxa, ás ordes de David Rial, durante a primeira parte da tempada, co que xa puido experimentar os primeiros pasos da súa adaptación ao noso equipo, o cal valora de forma moi positiva: “David axudoume moito a adaptarme en todos os aspectos. Valóroo dunha maneira moi positiva e estou agradecido porque necesitaba agarrar o ritmo de adestramento do equipo, entrar na dinámica e coñecer un pouco aos xogadores”. O xogador, que se define como “moi comprometido, rápido e explosivo, con bo 1 contra 1 e boa visión de xogo”, móstrase contento por volver ao club que o viu medrar: “É o club do pobo onde me criei e a verdade é que sempre quixen volver defender estas cores”. Os seus obxectivos para esta tempada serán “competir ao máximo en cada partido, axudar ao equipo en todo o que poida e conseguir os obxectivos que nos propoñamos”.

O á mariñán envía unha mensaxe positiva á afección prometendo “traballo, sacrificio e dar o mellor de min en cada partido para superar as expectativas de todos”.