O Foro Social da Mariña organiza unha conferencia sobre dependencia e discapacidade en Burela

A Mariña, 3 de marzo, 2026. O Foro Social da Mariña organiza unha conferencia-coloquio titulada “Dependencia e Discapacidade: Problemas e Propostas”, que terá lugar o venres 6 de marzo ás 20:00 horas na sala de conferencias da antiga biblioteca de Burela.

O relatorio será impartido por Francisco L. Vázquez Vizoso, epidemiólogo e médico especialista en medicina preventiva, ex-xefe do Servizo de Medicina Preventiva do Complexo Hospitalario de Pontevedra e membro do grupo promotor da Asociación Galega en Defensa do Sistema Público de Dependencia e Discapacidade (ASGADeD).

Durante a conferencia analizaranse os datos do Sistema para a Autonomía e Atención á Dependencia (SAAD) en Galicia, que —segundo o Foro Social da Mariña— amosan para o exercicio 2025 unha redución en prestacións esenciais como o Servizo de Axuda no Fogar (SAF), os centros de día (SCD) ou os servizos de prevención e promoción da autonomía. Tamén se abordará o déficit de prazas residenciais, estimado en 11.509 prazas en 2024, segundo información publicada recentemente en medios de comunicación.

O Foro alerta de que estas políticas responden a unha estratexia de abaratamento de custos que afecta á calidade dos coidados e perpetúa a desigualdade de xénero, ao priorizar coidadores non formais fronte a profesionais formados. Segundo a entidade, isto deriva nun modelo de beneficencia “low cost” dirixido ás persoas con menos recursos, favorecendo a transferencia de rendas das familias cara ás empresas privadas do sector e desviando fondos do público ao privado.

O colectivo subliña que, para a maioría da poboación, acceder a unha praza pública de dependencia é difícil e moi custoso, especialmente no caso do SAF, dos centros de día e, sobre todo, das residencias.