José Fernández García, de Ribadeo, conducirá o primeiro taxi eléctrico da Mariña

Ribadeo, 7 de maio de 2026. Ribadeo conta co primeiro taxi eléctrico da Mariña. José Fernández García, taxista desde hai quince anos neste concello, decidiu cambiar de coche “debido ao prezo desorbitado que está a ter o diésel. Despois de traballar con tres vehículos de gasóleo levo xa máis dun mes co eléctrico e o balance económico é moi positivo”.

Para José Fernández “o bo disto é poder cargar o taxi na casa. Eu dispoño dun cargador. Conto poder obter unha subvención de 8.500 euros en total da Xunta de Galicia e do Goberno do Estado, xa que están a apostar por este tipo de transporte”.

O taxista ribadense avoga “pola instalación dun cargador eléctrico na parada de taxis de Ribadeo. Estaría moi ben que desde o Concello se realizasen os trámites para poder contar con este sistema, que facilitaría que máis compañeiros puidesen optar por este tipo de vehículo”.

A Mariña e o Occidente asturiano contan con bastantes puntos de carga eléctrica: “hai unha app que nos indica onde están esas estacións de carga”. E pon como exemplo que “para unha viaxe duns 800 quilómetros é preciso facer dúas ou tres paradas de carga de 20 minutos cada unha”. Ata o momento “as viaxes máis longas que fixen neste mes foron a Ourense e a Cantabria”.

Fernández García subliña que “a condución do coche eléctrico é moito máis cómoda que con combustible, a contaminación destes vehículos é cero e o prezo non é desorbitado, sobre todo na marca pola que eu me decantei, que é Mazda”.

As viaxes diarias deste taxista ribadense discorren aos aeroportos de Avilés, Santiago e A Coruña, aos centros hospitalarios de Lugo e da Coruña, á praia das Catedrais: “son moitas as persoas que empregan o noso servizo, que lles dá acceso directo ao areal nas épocas nas que é preciso contar con pase para visitar a emblemática praia. Tamén peregrinos estranxeiros, que queren aproveitar o seu paso por Ribadeo para visitar As Catedrais, outros que deciden facer unha etapa en taxi, porque senón non lles dá tempo a chegar no itinerario e nos días que teñen destinados a facer o Camiño de Santiago. Hai de todo”. O taxi de José Fernández García tamén presta o seu servizo ao PAC de Ribadeo “para o traslado aos domicilios dos médicos de urxencias”.