Ribadeo, 30 de maio, 2026. O BNG de Ribadeo anunciou que trasladou ao Consello de Contas as supostas irregularidades detectadas na xestión das obras do Hospital-Asilo. A formación nacionalista tomou esta decisión despois de que o goberno de Daniel Vega bloquease de maneira reiterada o acceso á información e incumprise a súa promesa de convocar con urxencia aos grupos municipais para ofrecer explicacións.
O portavoz municipal do BNG, Martín Graña, cualificou a situación de “escandalosa”. Segundo explica, a acta de comprobación das obras correspondente ao pasado mes de decembro constata oficialmente a existencia de partidas económicas pagadas por traballos que non foron executados.
“Estamos a falar de que supostamente se pagou con cartos públicos por traballos que son fume”, denunciou Graña, quen advertiu do risco extremo que isto supón para as subvencións vinculadas ao proxecto. “Se o Concello certifica e paga obras non feitas, Ribadeo enfróntase non só a un problema legal grave, senón ao perigo real de ter que devolver as axudas recibidas. Iso sería un buraco económico intolerable para o municipio e deixaría a obra a medias”.
O BNG lembra que o contrato establecía que a reforma do Hospital-Asilo debía estar completamente rematada en abril de 2025. Non só non se cumpriu ese prazo, senón que as obras permanecen paralizadas desde novembro de 2025.
“Detrás dos papeis e dos atrasos hai persoas e familias de Ribadeo que precisan un servizo social esencial. Mentres o alcalde vende fume, as instalacións seguen pechadas, as obras abandonadas e a xestión económica baixo sospeita”, criticou Graña.
Ante a gravidade dos feitos recollidos na acta de decembro, o BNG solicitou acceso ao expediente completo ata en tres ocasións desde febreiro, sen obter resposta. Pola súa parte, Daniel Vega comprometeuse a convocar unha Xunta de Portavoces para informar da situación, pero esa reunión aínda non foi convocada.
“Daniel Vega utiliza o ocultismo como escudo. Se todo estivese limpo e fose transparente, non tería medo de poñer os papeis enriba da mesa. Ao negarse a dar información e ao fuxir do control democrático, confirma que ten moito que agochar”, afirmou o portavoz nacionalista.
Por todo isto, e co obxectivo de protexer o patrimonio público e os intereses das veciñas e veciños de Ribadeo, o BNG puxo os feitos en coñecemento do Consello de Contas para que este órgano fiscalizador audite o destino dos fondos e as certificacións de obra. “O goberno local pechou as portas á transparencia, polo que nos vemos na obriga institucional e moral de acudir a outras instancias para aclarar ata o último céntimo pagado nesta obra”, concluíu Graña.
Baixo o título “A guerra en Oriente Medio. Do xenocidio en Palestina á agresión a Irán”, o analista internacional Duarte Correa ofrecerá unha intervención centrada na evolución do conflito, o impacto humanitario e as implicacións xeopolíticas da escalada bélica na rexión.
A proba, organizada polo CP Altrúan, reunirá 137palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García achegouse esta tarde a Ribadeo para presentar a proba, que comezará ás 15.30 coa saída dos prebenxamíns e benxamíns. A continuación e de forma escalonada, desenvolveranse as probas das categorías infantil, alevín e cadete e xuvenil.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
A Garda Civil de Burela tomou declaración este 10 de xuño a unha representante do departamento en liña de Porcelana de Sargadelos, que denunciou unha estafa na que se emprega a imaxe da empresa para enganar clientes. Segundo explicou, desde finais de abril están a aparecer páxinas web falsas con descontos do 80% e perfís fraudulentos en redes sociais como Instagram, TikTok e Facebook, a través dos que varios usuarios xa foron estafados. A compañía presentou denuncias contra distintos dominios e contas, das que só unha continúa activa, e achegou tamén os rexistros da marca e as comunicacións realizadas ante Meta. A denuncia foi formalizada no cuartel da Garda Civil de Burela, onde quedou incorporada ás dilixencias abertas polo corpo.
O deputado galego Francisco Millán Mon explicoulles o día a día da súa actividade nesta cámara e a importancia da Unión Europea para Galicia e viceversa. Desde a dirección do centro agradecen “a súa exposición e o trato dispensado ao alumnado e profesorado desprazado a Bruxelas”. Neste 2026 cúmprense 40 anos da adhesión de España á Comunidade Económica Europea, así se denominaba naquel momento. O IES de Ribadeo é Escola Mentora do Programa Escolas Embaixadoras do Parlamento Europeo.
Foi unha xornada máxica na que a música e a convivencia se deron a man nunha contorna única. Os instrumentos de corda encheron de melodías os xardíns do centro, creando unha atmosfera especial que emocionou ao público asistente e puxo en valor o talento e a ilusión da mocidade. A alcaldesa de Cervo, Dolores García Caramés, non quixo perderse esta cita tan especial e desfrutou da tarde xunto ás persoas usuarias, e o persoal do centro. Durante o encontro, agradeceu o convite e felicitou á organización por promover actividades que fomentan a cultura, a inclusión e os espazos de encontro entre a veciñanza.
A mostra, aberta na sala de exposicións do Auditorio Municipal de luns a venres entre as 18:00 e as 22:00 horas, reúne preto de 30 obras de artistas emerxentes e consolidados, ofrecendo diversas miradas sobre a paisaxe, a identidade, a memoria e a realidade contemporánea. A alcaldesa, Marta Rouco, destacou o valor de que Vilalba forme parte desta programación compartida e o impacto positivo que supón para a actividade cultural local.
