Ribadeo izará esta venres a súa primeira bandeira oficial nun acto con Rueda e Barbón

Ribadeo, 3 de xuño de 2026. A bandeira de Ribadeo será izada este venres, día 5 de xuño, cun acto institucional no que participarán os presidentes da Xunta de Galicia e do Principado de Asturias, Alfonso Rueda e Adrián Barbón, respectivamente.

A celebración deste acto foi anunciada polo alcalde ribadense, Dani Vega: “Ribadeo vai acoller un acto institucional este venres ás 11 da mañá no Concello. Será para izar a bandeira de Ribadeo, a primeira que vamos ter aprobada pola Comisión de Heráldica. Ademais imos renovar o escudo local, tamén aprobado pola Comisión de Heráldica”.

O rexedor municipal destaca que é un acto “cunha simboloxía moi importante, cunha carga institucional evidente, pero tamén con gran sentimento de localidade, de concello e cunha carga histórica moi profunda. Tamén vamos enviar unha mensaxe porque imos aproveitar esta ocasión para volver dicir con claridade que Ribadeo é a capital do encontro, un espazo que acolle sistematicamente a dúas comunidades autónomas: unha de pertenza, a nosa comunidade galega. Moitos veciños e veciñas veñen doutros concellos e doutras provincias a Ribadeo, pero tamén acollemos sempre aos nosos veciños asturianos. Por iso quixemos invitar ó presidente da Xunta, Alfonso Rueda, e a Adrián Barbón, o presidente do Principado. Con iso enviamos unha mensaxe de unión, de acollida á comunidade do Principado amigo e tamén de traballo conxunto en moitas estratexias de comunidades autónomas, de investimento, de impacto económico, de medio ambiente, agricultura, tamén industrial; unha forma de traballar en defensa do noso, pero tamén de municipios, de inversións, de infraestruturas, de vías de comunicación, de impacto económico, de industria, como pobos que traballamos, entre Galicia e Asturias, baixo unha estratexia. E tamén acollendo sempre ós nosos veciños asturianos que veñen a Ribadeo todos os días. É unha forma tamén de darlles as grazas, de seguir dicindo que Ribadeo agradece e acolle ó pobo asturiano e tamén dicir con moita claridade que cun acto con esta simboloxía, cunha carga emocional profunda, enviamos outra vez unha mensaxe de unión”.

Dani Vega engade: “agradezo ao presidente da Xunta a súa presenza e tamén ao presidente Adrián Barbón por vir a Ribadeo outra vez máis. E agradezo aos medios de comunicación, neste caso á Voz de Galicia porque lidera os Encuentros en el Eo; a Lois Blanco, o presidente da Voz de Galicia, por acudir a Ribadeo, e ó director xeral do Sabadell por cofinanciar estes Encuentros en el Eo e tamén participar no izado da bandeira, acto ao que invitamos a todos os veciños e tamén aos visitantes. Por parte do Concello dous policías locais entregarán a bandeira aos presidentes de Asturias e de Galicia. Van ser Vicente García, o axente con máis antigüidade, e Alberto Díaz, que é o máis novo na nosa Policía. É un acto no que convido a participar a todos os veciños e a todos os visitantes, con ánimo e con alegría e tamén con sentimento da localidade que somos, Ribadeo, cunha carga histórica profunda, cun sentimento de vila e de concello moi importante”.

O alcalde de Ribadeo explica ademais que con este acto “volvemos enviar esa mensaxe de unión, de entendernos con todos, de estar nunha estratexia conxunta entre Galicia e Asturias. E, polo tanto, o noso agradecemento ao pobo asturiano por contar con Ribadeo, querer a Ribadeo e respectar o pobo no que vivimos”.