Acisa repartirá 180.000 rifas para sortear unha viaxe a México no XI Ribadeo Indiano

Ribadeo, 21 de xuño de 2026. Os establecementos asociados a Acisa repartirán 180.000 rifas entre o 19 de xuño e o 12 de xullo, xornada na que terá lugar o sorteo dunha viaxe a México no marco do XI Ribadeo Indiano. Será ao remate do concerto que Estrellas de Buena Vista y Más ofrecerán na rúa San Roque. A viaxe, para dúas persoas, poderá desfrutarse do 11 ao 18 de setembro de 2026 e inclúe o voo Madrid-México-Madrid, sete noites de hotel en habitación dobre premium room no Iberostar Waves Paraíso de 5 estrelas en réxime de todo incluído, ademais de servizos extra como embarque preferente, asentos especiais ou asistencia a eventos na Riviera Maya.

A presidenta de Acisa, Carmen Cruzado, explicou que “dende Acisa quixemos un ano máis poñer os máximos recursos posibles a disposición dos nosos socios e socias para contribuír a facer o mellor Ribadeo Indiano posible e deste xeito dinamizar a economía local”. Lembrou que esta será a sexta vez que a asociación envíe unha parella ás Américas e destacou que o sorteo é “unha cita moi agardada tanto polos negocios locais asociados como pola súa clientela”.

O xerente de Acisa, Jesús Pérez, detallou que nesta edición se poñen en circulación 180.000 papeletas, 20.000 máis que o ano pasado, e subliñou que participar é moi sinxelo: as rifas estarán dispoñibles nos establecementos asociados e deberán ir seladas polos negocios. O día do sorteo, entre as 16:00 e as 21:00 horas, deberán depositarse na urna situada fronte aos Cocos na rúa San Roque. Pérez estimou que, sendo prudentes, a campaña podería xerar un impacto económico de arredor de 1,8 millóns de euros en Ribadeo durante as tres semanas previas ao evento.

Cruzado agradeceu o apoio das administracións e das empresas patrocinadoras —Cervexas Alhambra, Banco Sabadell, Caixa Rural, Vitaldent, Gestión Gratelu e Discosta— e recoñeceu o traballo do persoal do Concello, de Acisa e das persoas voluntarias que fan posible un evento destas dimensións. “A conta atrás comezou e aquí xa se respira o seu ambiente. As maletas, as hortensias, as fotos, as lembranzas e a morriña empezan a invadir este concello e a memoria das súas xentes”, afirmou.

A iniciativa conta coa colaboración da Vicepresidencia da Deputación de Lugo, que apoia un ano máis a organización do Ribadeo Indiano cunha achega de 25.000 euros para actividades lúdicas e culturais, así como para a decoración dos locais e das rúas que recrean o ambiente dunha cidade de ultramar de comezos do século XX.

No acto de presentación da viaxe a México participaron representantes de Acisa, da Vicepresidencia da Deputación de Lugo, do Concello de Ribadeo e das firmas patrocinadoras.

O deputado Daniel García, presente no acto, sinalou que “a participación da sociedade ribadense é unha das chaves da proxección que logrou o Ribadeo Indiano en Galicia e fóra, e Acisa fai unha labor fundamental nesa dinamización con iniciativas como este sorteo ou coa decoración e a ambientación das rúas”. Ratificou tamén “o apoio da Vicepresidencia da Deputación ao Ribadeo Indiano, que alén da dimensión lúdica, pon en valor o legado arquitectónico, educativo, social e cultural da emigración a América”.