Os traballos realizados polo Parque Móbil consistiron na limpeza de cunetas das vías provinciais LU-P-0609 ao seu paso pola parroquia de San Xusto de Cabarcos; e na LU-P-6103, que é a única vía que conecta o municipio barreirense co de Trabada
Lugo, 24 de xuño de 2026. A Deputación de Lugo intensifica os traballos de mantemento nas estradas provinciais da Mariña de cara á campaña de verán, co obxectivo de reforzar a seguridade viaria nun período no que a zona rexistra unha importante afluencia de visitantes.
Neste senso, as máquinas do Parque Móbil provincial veñen de rematar no concello de Barreiros os traballos de limpeza de cunetas na estrada LU-P-0609, ao seu paso pola parroquia de San Xusto de Cabarcos, nun treito que se estende desde o inicio da vía ata o punto quilométrico 2,3, nas proximidades do Camiño de Santiago. Así mesmo, os operarios provinciais tamén actuaron na LU-P-6103, que conecta o municipio de Barreiros co de Trabada, nun tramo de aproximadamente 300 metros.
Estas intervencións permiten mellorar a drenaxe das estradas, favorecer a súa conservación e reforzar a seguridade das condicións de circulación nos distintos núcleos aos que dan servizo. Ademais, contribúen a prolongar a vida útil das infraestruturas e a evitar deterioros maiores, apostando por un modelo de conservación preventiva que optimiza os recursos públicos e mellora a seguridade da rede viaria provincial.
Tras estes traballos, as máquinas do Parque Móbil continuarán actuando en distintas pistas rurais do municipio, co fin de mellorar a súa funcionalidade e garantir unhas condicións axeitadas de circulación. As accións forman parte do compromiso do Goberno provincial coa cooperación cos concellos e da aposta que ten a Deputación por uns servizos públicos de calidade en todos os municipios da provincia.
Máis de 700.000€ investidos neste municipio
Estes traballos de conservación do Parque Móbil súmanse ás melloras na rede viaria provincial acometidas neste municipio cun investimento conxunto que ascende a máis de 700.000 euros. A actuación máis recente é a renovación da estrada LU-P-0610, que conecta os accesos ás praias da costa barreirense, cun investimento de 210.000 euros. Trátase dunha intervención relevante que contribúe a reforzar a proxección turística do municipio e do conxunto da Mariña, así como a mellorar os accesos aos seus principais areais, un dos seus principais atractivos. Os traballos incluíron a mellora do firme, da drenaxe e da sinalización horizontal e vertical, así como a ordenación de 80 prazas de aparcadoiro na contorna da praia de Altar, nunha vía clave polo seu elevado volume de tráfico durante a época estival.
Esta actuación complétase con outras intervencións previas na mesma estrada e coa mellora doutras vías provinciais como a LU-P-0611 e a LU-P-0602, reforzando a mobilidade e a conexión entre os principais núcleos e praias do municipio.
A iniciativa xurdiu co obxectivo de xuntar o alumnado que coincidira na EGB, pero axiña se ampliou a todas aquelas persoas que compartiron pupitres e amizades tamén no instituto.
O público, totalmente entregado de principio a fin, amosouno cos intensos e prolongados aplausos que acompañaron toda a actuación. Ao remate, os asistentes expresaron o seu desexo de poder gozar no futuro de novos concertos do artista, que sen dúbida volverán entusiasmar ao público.
Villares subliñou o éxito de convocatoria do evento, que reúne cada ano a numerosos participantes e afeccionados en Ribadeo, “aproveitando o atractivo da ría e do seu porto deportivo para atraer visitantes e complementar co deporte a súa ampla oferta de natureza, patrimonio e gastronomía”. A presente edición estivo dedicada á figura de Leopoldo Calvo-Sotelo, con motivo do centenario do nacemento do que fora presidente do Goberno e alcalde honorario do municipio. Ademais das regatas de vela en distintas categorías, celebráronse bautizos de buceo, charlas ou un concurso de pesca, entre outras actividades.
Na xuntanza preténdese analizar a execución das obras, o comportamento da empresa responsable, a problemática dos accesos durante as Festas de Xunqueira e solicitar ao Concello de Viveiro que faga público o proxecto definitivo.
A marcha partirá ás 12:30 horas diante do Concello, percorrerá as rúas peonís do centro e rematará novamente na casa consistorial, onde se lerá un manifesto. A plataforma chama a mobilizarse cunha mensaxe clara: cada bomba destrúe vidas e cada silencio convértenos en cómplices. Defenden que é o momento de saír á rúa para esixir o fin da violencia, o respecto aos dereitos humanos e a liberdade do pobo palestino, lembrando que a presenza das persoas manifestantes é a voz de quen hoxe non pode falar. A convocatoria péchase cun triplo chamamento: non á guerra, non ao silencio e non á indiferenza.
Estiveron acompañados polas dúas técnicas de Xuventude, para gozar dunha mañá nas distintas actividades que ofrece este parque de trampolíns. Pola tarde, o grupo parou a xantar no Lago das Pontes, onde puido coñecer a historia da súa creación e desfrutar dun baño. A viaxe estivo organizada polas Concellerías de Xuventude e Deporte e pola Oficina de Información Xuvenil dentro do programa “Verán a Tope en Xove 2026”.
Evaristo Calvo, Rebeca Montero e Vítor Mosqueira interpretaron o pasaxe que recrea os últimos momentos do Mariscal Pardo de Cela e da súa muller, Isabel de Castro, antes da traizón da Frouseira. A acción cultural, coordinada por Carme Varela e promovida pola Vicepresidencia da Deputación de Lugo, rende homenaxe ao gran dramaturgo do Valadouro no seu primeiro cabodano. 
