O programa municipal ofrecerá durante os meses de xullo, agosto e setembro oito propostas para descubrir o patrimonio marítimo, natural, xeolóxico e cultural da localidade
Burela, 26 de xuño de 2026.- O Concello de Burela pon en marcha unha nova edición de «Burela de Ruta», o programa municipal de actividades turísticas que permitirá coñecer durante os meses de xullo, agosto e setembro algúns dos principais recursos patrimoniais, culturais, naturais e vinculados ao mar do municipio.
A programación deste ano incorpora como principal novidade as visitas guiadas ao Molde do Faro, unha estrutura metálica empregada na reconstrución do faro de Burela en 2014 e situada actualmente nas inmediacións da praia da Marosa. No seu interior pode contemplarse unha obra do artista David Catá.
As visitas ao Molde do Faro desenvolveranse todos os martes ás 16.30 horas, terán unha duración aproximada de media hora e serán gratuítas. Debido á limitación de prazas, será necesario realizar unha reserva previa a través da páxina web reservasmoldedofaro.burela.org.
Outra das novidades desta edición será a profesionalización das visitas á lonxa de ABSA, que estarán guiadas por Rutas Galicia Norte. Durante a actividade, as persoas participantes poderán presenciar a poxa do peixe e coñecer o funcionamento e as particularidades dunha instalación fundamental para comprender a identidade mariñeira e a actividade económica de Burela.
As visitas á lonxa celebraranse de luns a xoves en horario de tarde: os luns ás 18.00 horas e de martes a xoves ás 19.00 horas. O prezo será de 8 euros para persoas adultas e de 5 euros para menores de 17 anos, mentres que os menores de 12 anos poderán acceder gratuitamente. A reserva será obrigatoria a través do formulario dispoñible en rutadopeixe.burela.org, xa que non se permitirá o acceso ao recinto sen inscrición nunha visita guiada.
Xeoloxía, aves e patrimonio histórico
O programa recupera tamén as tradicionais XeoRutas, percorridos guiados e interpretados por unha profesional da xeoloxía que permitirán descubrir o variado patrimonio xeolóxico do litoral burelés. Nesta edición ofreceranse tres itinerarios diferentes: A Marosa, O Cantiño e O Perdouro, distribuídos en distintas datas ao longo dos meses de xullo, agosto e setembro.
As XeoRutas serán gratuítas, aínda que requirirán reserva previa mediante a páxina turismo.burela.org/rutas-xeoloxicas.
A oferta de natureza completarase coas rutas ornitolóxicas, guiadas por un ornitólogo e programadas para finais do verán, coincidindo co paso das aves migratorias mariñas. Durante a actividade prestarase material óptico para facilitar a observación das diferentes especies.
A participación será gratuíta, pero será necesaria a inscrición previa a través do correo electrónico oficinadeturismo@burela.org, que poderá formalizarse desde tres días naturais antes de cada ruta.
A programación inclúe igualmente as visitas á conserveira artesanal Faro de Burela, onde as persoas asistentes poderán coñecer, durante unha explicación de entre dez e quince minutos, o proceso tradicional de embotado do bonito para a súa conservación. Estas visitas desenvolveranse durante as tardes dos xoves e venres dos meses de xullo e agosto, con inscrición previa na Oficina de Turismo.
Pola súa parte, a ruta guiada «Máis alá do mar» permitirá percorrer a Vila do Medio e coñecer a evolución histórica e social do barrio máis antigo de Burela. O itinerario, de menos de dous quilómetros, finalizará na igrexa da Vila do Medio, que conserva pinturas de finais do século XV.
Estas rutas serán gratuítas e celebraranse todos os xoves ás 10.30 horas, con reserva previa no correo electrónico oficinadeturismo@burela.org.
A memoria mariñeira de Burela
A Asociación de Mariñeiros Xubilados A Moncloa continuará ofrecendo visitas guiadas gratuítas ao seu local, de luns a venres entre as 10.00 e as 14.00 horas. Unha oportunidade para achegarse á historia marítima de Burela a través das testemuñas e das experiencias dos seus protagonistas.
A programación complétase co Barco Museo Boniteiro «Reina del Carmen», un pesqueiro tradicional de madeira aberto durante todo o ano que ampliará o seu horario no verán coa incorporación dunha visita ás 19.00 horas.
En total, ofreceranse seis visitas guiadas diarias nas que se explicarán diferentes artes de pesca, os principios da pesca sostible e a forma de vida a bordo dun pesqueiro dos anos sesenta.
A entrada xeral terá un prezo de 5 euros para persoas adultas e de 3 euros para menores de 17 anos, mentres que os menores de oito anos poderán acceder gratuitamente. As reservas deberán formalizarse a través da web reservasbarcoboniteiro.burela.org.
Con esta nova edición de «Burela de Ruta», o Concello continúa apostando por unha oferta turística baseada na identidade mariñeira, a divulgación do patrimonio local, a natureza e a sustentabilidade, permitindo tanto á veciñanza como ás persoas visitantes descubrir Burela desde diferentes perspectivas.
Toda a información sobre as actividades, datas, horarios e sistemas de reserva pode consultarse na páxina web turismo.burela.org, dentro do apartado «Visitas».
A artista, referente da música popular galega, conectou cun público diverso que gozou dunha sesión vermú marcada por máis de trinta anos de traxectoria. O concerto serviu tamén como despedida e recoñecemento a Valentín González e Viviana Pérez, que deixan a organización da comisión de festas tras dúas décadas. O deputado de Mocidade, Daniel García, destacou a importancia da implicación veciñal para manter vivas as celebracións que fortalecen a identidade comunitaria e reafirmou o apoio da Deputación ás redes asociativas e á programación cultural en galego. A actuación forma parte da iniciativa provincial para achegar música tradicional e en galego a todos os públicos.
Cómpre sinalar que este produto conta cun distintivo de calidade diferenciada, a Indicación Xeográfica Protexida Faba de Lourenzá, un dos 36 selos recoñecidos en Galicia que amparan a súa excelencia. Neste sentido, a Xunta vén de lanzar a nova marca Aquí Sabemos, coa que se busca reforzar o coñecemento e a identificación por parte dos consumidores dos produtos alimentarios galegos protexidos por figuras de calidade diferenciada.
Co sol ocultándose e a lúa asomando entre as torres de Donlebún, o músico e divulgador reivindicou o poder evocador e transformador do bravú fronte á morriña paralizante. Na sala de lectura da biblioteca, Souto explicou a evolución do rock bravú no imaxinario galego, evocando as músicas populares que acompañaron durante décadas os remolques dos pascualiños e os labores comunitarios, e lembrando a vitalidade de grupos como Skornabois, Diplomáticos de Monte Alto, Xenreira, Zënzar, Pinto de Herbón ou os Rastreiros. A boa lembranza da súa anterior visita levou ao artista a pechar a velada interpretando o “Himno de Ribadeo”, composto por Arturo Mogo, nun final cheo de afecto pola vila e pola súa identidade cultural.
O evento ofrecerá mel, produtos de tempada, artesanía, gastronomía e outras propostas locais. O Concello do Valadouro mantén aberto o prazo de inscrición para persoas e empresas expositoras, que poden presentar a súa solicitude na sede electrónica ou nas oficinas do Centro Socio-cultural, Xuvenil e da Terceira Idade “Manuel Lourenzo” ata o martes 6 de outubro, ou ata completar os postos dispoñibles.
Estiveron organizadas por Acisa e financiadas pola Área de Medio Rural e Mar da Deputación de Lugo. 25 locais hostaleiros ofreceron tapas e racións en diversas preparacións. Acisa repartiu entre os establecementos 1.100 quilos de mexillóns para esta cita gastronómica. Ata Ribadeo se achegou o deputado Dani García, que estivo xunto á presidenta e o xerente de Acisa, Carmen Cruzado e Jesús Pérez, e os concelleiros ribadenses Martín Graña e Vicente Castro.
Neste espazo radiofónico Félix Jorquera falou coa alcaldesa de Lourenzá, Rocío López; co concelleiro de Cultura, Manuel Arango; con José Cuadrado, presidente da Indicación Xeográfica Protexida Faba de Lourenzá e pregoeiro desta edición da festa; co chef Pedro Barreira; e con Antonio Irimia, presidente do club VespaFaba & Clásicos, de Lourenzá. Por diante queda toda unha fin de semana chea de actividades arredor da faba de Lourenzá. Os organizadores animan a acudir a esta cita.
Os asistentes puideron coñecer de preto unha particular viaxe que parte de Ribadeo e percorre Galicia en 37 etapas bordeándoa e combinando ciclismo, patrimonio, cultura e paisaxe. Jorge Justo estivo acompañado polo alcalde de Ribadeo, Dani Vega, e por Pablo Mosquera, ex director do Hospital da Costa (agora Hospital Público da Mariña).
