Calabash regresa aos escenarios en Ribadeo cun concerto multitudinario tras oito anos de silencio

Ribadeo, 1 de agosto de 2026. O grupo ribadense de percusión Calabash volveu tocar despois de oitos anos sen facelo. Foi onte, venres, pola noite no auditorio municipal Hernán Naval, co acompañamento da Charanga A Choca como convidada nalgúns temas e ante unha gran cantidade de público.

O director de Calabash, Marcos Rodríguez Rodríguez, explica que “o auditorio viviu onte unha desas noites que quedan na memoria. Calabash regresou aos escenarios cun concerto no que a música foi a protagonista, pero tamén o reencontro entre compañeiros e amigos despois de tanto tempo sen tocar xuntos. O público respondeu enchendo practicamente o auditorio e, desde o primeiro tema, creouse un ambiente de festa e complicidade que acompañou toda a actuación”.

Nesta ocasión Calabash reuniu 29 músicos sobre o escenario para ofrecer un repertorio “cheo de ritmo e variedade, con pezas como Si antes te hubiera conocido, de Karol G; Ger Lucky, Lambada, Oye cómo va, Cruzin Jamaica ou Summer Fun, que fixeron gozar ao público durante toda a noite”, comenta Marcos Rodríguez, que destaca: “o momento máis especial chegou coa incorporación da Charanga A Choca, convidada para celebrar o 40º aniversario. Preto de 60 músicos compartiron escenario para interpretar Brasil e La vida es un carnaval, dous temas que converteron o auditorio nunha auténtica festa, coa participación e os aplausos dun público completamente entregado. Como broche final todos os músicos permaneceron no escenario para interpretar I Will Survive, un clásico de Calabash que puxo o peche perfecto a unha noite cargada de emoción. A resposta do público foi tan calorosa que obrigou a volver saír para ofrecer un bis, repetindo Brasil xunto á Charanga A Choca”.

Para o director de Calabash “ao remate do concerto quedaba a sensación de que o máis importante fora volver compartir escenario e volver facer música entre amigos. As felicitacións do público e os comentarios dos asistentes coincidían na mesma idea: foi unha noite especial, das que deixan pegada. A celebración continuou despois do concerto, xa fóra do auditorio, onde músicos e acompañantes puideron compartir un tempo de convivencia, lembrando anécdotas e comentando unha actuación que, para moitos, supuxo moito máis ca un concerto: foi un reencontro e unha nova páxina na historia de Calabash”.