Mogo acusa aos senadores do PP de “engañar aos lucenses” e de esixir no Senado o que rexeitan en Galicia

A Mariña, 2 de agosto, 2026. O senador socialista César Mogo afirma que “os senadores do PP por Lugo parecen non ter outra ocupación que enganar aos lucenses. Chegan a esixir no Senado o que eles mesmos votaron en contra no Parlamento de Galicia. No caso de O Fiouco, cando gobernaba Rajoy, rexeitaron medidas de seguridade viaria moi inferiores ás que agora puxo en marcha o Goberno de Pedro Sánchez”.

Segundo Mogo, “non se sabe se é engano ou ignorancia da legalidade, pero os senadores do PP seguen dando a entender que as mocións do Parlamento son de obrigado cumprimento para o Goberno, cando é exactamente o contrario. O Tribunal Supremo e o Tribunal Constitucional xa estableceron que o Executivo non ten ningunha obriga de executar esas mocións”.

O senador considera especialmente rechamante que “mentres o señor Balseiro insiste en mocións de hai meses só para saír nos xornais, non mostra interese algún pola situación sanitaria calamitosa na Mariña. No Concello de Cervo, por exemplo, en pleno mes de agosto só haberá un médico para dous centros de saúde. No de San Cibrao xa se cancelaron citas comprometidas”.

Mogo conclúe que “o PP non dedica atención ningunha a que en Cervo, como en tantos outros concellos, se rebaixase a atención sanitaria. Viven pendentes da néboa en O Fiouco —cando as horas de peche se reduciron drasticamente— pero non queren ver a desatención médica que teñen diante dos seus ollos e que cada día vai a peor”.