Técnicos da institución provincial recolleron estes dispositivos que mellorarán as condicións de traballo dos 120 efectivos e a prestacións do servizo aos cidadáns
Lugo, 14 de setembro de 2026. A Deputación de Lugo repartirá 72 novas emisoras de radiocomunicación dixital portátiles entre os seis parques de bombeiros do Consorcio Provincial. Os equipos, que levaban anos sendo solicitados pola institución provincial, foron recollidos este luns por técnicos da Deputación na Estrada e permitirán renovar os dispositivos empregados polos efectivos nas súas intervencións.
Os novos terminais empregan tecnoloxía dixital TETRA e están integrados na Rede Dixital de Emerxencias e Seguridade de Galicia (RESGAL), á que o Consorcio se incorporou en 2016. Uns dispositivos que supoñen unha mellora nas comunicacións dos bombeiros, ao ofrecer maior seguridade e fiabilidade, facilitar a coordinación entre os equipos e permitir establecer grupos de comunicación específicos para cada operativo.
Esta renovación actualiza os medios de comunicación dos parques de bombeiros do Consorcio provincial -Barreiros, Vilalba, Sarria, Monforte de Lemos, Viveiro e Chantada-e dá resposta a unha demanda que a Deputación viña trasladando desde hai anos no marco do acordo asinado coa Axencia Galega de Emerxencias (AXEGA).
Formación práctica
Coincidindo coa renovación dos equipos, este luns comeza ademais unha nova acción formativa dirixida a todo o cadro de persoal do Consorcio, de todas as categorías profesionais, sobre apertura de portas en edificios e vehículos. A formación, impartida pola empresa Fuego y Mar, desenvolverase en distintas xornadas durante setembro e outubro e combinará contidos teóricos e prácticos.
O curso, de 7 horas de duración, permitirá aos profesionais perfeccionar as técnicas para comprobar e abrir portas mediante métodos non destrutivos e forzados, así como practicar a intervención en diferentes escenarios e tipos de portas utilizando as ferramentas específicas. A formación desenvolverase en Santiago de Compostela.
Reforzo do cadro de persoal
A Deputación de Lugo mantén ademais aberto o proceso selectivo para cubrir 37 prazas de bombeiro-condutor do Consocio Provincial co obxectivo de reforzar os servizos nos seis parques comarcais. A semana pasada celebrouse o primeiro dos exercicios da oposición e das 233 persoas que se presentaron, superaron a proba 166, o 70%. Actualmente o cadro de persoal do Consorcio conta con 120 prazas.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Este luns, 14 de setembro, deu comezo un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
