O PSdeG de Barreiros denuncia o “uso partidista” do canon da auga por parte da Xunta ante o silencio cómplice do PP municipal

Mª Carmen Veiga critica que o Goberno galego cobre este tributo á veciñanza de Barreiros sen financiar as infraestruturas que precisa o municipio, como a nova depuradora de San Miguel

Barreiros, 6 de outubro de 2026. O Grupo Municipal Socialista de Barreiros logrou a aprobación no último pleno da súa moción para esixir á Xunta de Galicia un sistema público, transparente e obxectivo de distribución dos fondos recadados a través do canon da auga e do canon de xestión das depuradoras. A iniciativa saíu adiante coa abstención do PP, unha postura que a voceira socialista, Mª Carmen Veiga, criticou por antepoñer os intereses do seu partido á reclamación dos investimentos que necesita o municipio.

Durante a defensa da proposta, Veiga denunciou o “uso partidista” destes recursos por parte do Goberno galego e cuestionou que a veciñanza de Barreiros pague estes tributos sen que a Xunta financie as infraestruturas de saneamento que precisa o concello.

“Todos os veciños e veciñas de Barreiros pagamos o canon da auga no noso recibo, un imposto da Xunta que, en teoría, debería volver ao noso municipio en forma de investimentos para saneamento e infraestruturas. Porén, a realidade é que Barreiros non recibe ningunha axuda. Os fondos non retornan. Sempre son beneficiados os mesmos: os concellos da mesma cor política que a Xunta de Galicia”, afirmou.

Como exemplo deste agravio, a tenente de alcaldesa sinalou a nova depuradora de San Miguel, unha infraestrutura que cualificou de “urxente e fundamental” para o municipio e que, segundo denunciou, non conta con financiamento autonómico.

Veiga lamentou que, ante estas necesidades, o PP optase por absterse. “Coa súa abstención, o PP mostra claramente que está en contra desta reclamación e prefire poñerse de perfil. Deixan claro que a súa prioridade é non incomodar aos seus xefes na Xunta, aínda que iso supoña darlle as costas á veciñanza e renunciar aos cartos que lexítimamente nos pertencen aos barreirenses”, criticou.

Fronte a esta xestión “discrecional”, a moción do PSdeG reclama un cambio radical no modelo de financiamento. O acordo insta ao Goberno galego a garantir que, como mínimo, o 50% da recadación obtida nun concello reverta de forma directa en investimentos no propio municipio.

Ademais, propón destinar un 30% destes fondos a un mecanismo de solidariedade territorial para os concellos con maiores necesidades, limitar a un máximo do 20% a reserva para os custos do sistema autonómico e publicar un informe anual que permita coñecer o destino dos recursos e garantir a transparencia na xestión destes tributos

“Esiximos que a asignación de recursos responda a criterios técnicos e obxectivos, sen estar condicionada por afinidades políticas. Os cartos dos veciños e veciñas de Barreiros teñen que volver a Barreiros”, concluíu Veiga.