Botou a andar o centro cultural da Alcántara en Mondoñedo no que a Deputación investiu 185 mil euros

Nota de prensa

ANTONIO VEIGA VISITOU O CENTRO CULTURAL DA ALCÁNTARA, EN MONDOÑEDO

Antón Meilán ofrecía no novo centro unha conferencia titulada “Mondoñedo, berce de escritores”

A Área de Cultura da Deputación financiou o acondicionamento da antiga igrexa da Alcántara con 185.000 euros

MONDOÑEDO, 16 de maio de 2011. O delegado de Cultura e Deporte da Deputación, o nacionalista Antonio Veiga, estivo esta fin de semana visitando a Igrexa de San Pedro de Alcántara, que tralas obras de acondicionamento financiadas con 185.000 euros pola Área de Cultura da Deputación de Lugo é o novo centro cultural de Mondoñedo. O alcalde de Mondoñedo, Orlando González, mailo concelleiro de Cultura, Xusto Fernández, guiaron ao delegado de Cultura na súa visita e posteriormente, asistiron á conferencia de Antón Meilán titulada “Mondoñedo, berce de escritores”.

A cidade conta cun novo espazo de exposición e aproveitamento cultural, educativo e turístico das figuras artísticas máis importantes da historia de Mondoñedo: Leiras Pulpeiro, Noriega Varela, Pascual Veiga, Cunqueiro ou o mestre Pacheco e os mestres de capela. Como indicou Veiga, “a igrexa agora está chea de contido e dáselle un valor cultural engadido, que suporá un grande beneficio para concello de Mondoñedo”. A igrexa está desacralizada, é de propiedade municipal e xa tivo historicamente unha vinculación co uso cultural do seu espazo, especialmente no ámbito musical. S. Pedro de Alcántara aparece citada en varios escritos históricos como “Teatro da Alcántara”, polo que reconvertela para uso sociocultural confírmase como unha iniciativa moi positiva.

O centro reúne o patrimonio literario e cultural de Mondoñedo, e está entendido de dúas maneiras: por unha banda, como centro contedor que se empregará para expoñer fondos e recibir visitantes, e ao mesmo tempo un centro produtor de contidos e promotor de actividades de divulgación, de cara á apertura á sociedade. Polo tanto, a oferta expositiva e cultural terá carácter permanente, e as iniciativas que se xeren no novo centro xogarán un papel importante en beneficio do desenvolvemento e dinamización cultural, social e económica de Mondoñedo.