Fantasmas mediocres

Fantasmas mediocres

Permítanme un plaxio sen categoría de cita. Por aí abaixo, nesta mesma sección de Opinión, publican vostedes a colaboración “Partidismo por riba dos veciños”, que lla asinan a un tal Balseiro. Este pretende instruírnos explicando que “un dos erros máis graves nos que pode incorrer un político é o de carecer dun criterio claro e actuar dando bandazos”, e sentencia que “aqueles que así se comportan perden a súa credibilidade”. A experiencia é un grao.
O xuntaletras asalariado que escribiu o artigo que lle adxudican a José Manuel Balseiro Orol sabe que este Balseiro foi afiliado do PSOE, membro do comité de Cervo e tivo responsabilidade nesa agrupación socialista, ata que decidiu “actuar dando bandazos”, e fuxiu para o PP ao “carecer dun criterio claro”. No PP tocou teito, como secretario provincial dos conservadores, ante a abráiante escaseza de peóns que atopou na dereita, sendo consciente de que “aqueles que así se comportan perden a súa credibilidade”.
Remato. Quen confunde telefono con talefono, ou perplexico con tetrapléxico necesita formación e humildade e saber que cun xuntaletras letrado non se  acada a credibilidade.
De fantasmas mediocres está chea a clase política e os cidadáns non somos imbéciles, aínda que o pareza.
Xosé Rego