O concello de Burela solicita unha subvención á Xunta para contratar persoal para o GRUMIR

30 Marzo, 2012

O CONCELLO SOLICÍTALLE UNHA SUBVENCIÓN Á XUNTA PARA PROCEDER Á CONTRATACIÓN DAS 12 PERSOAS QUE FORMARÁN PARTE DO GRUMIR ATA FINAIS DE ANO. GONZÁLEZ BARCIA AGARDA QUE NO PRAZO DUN MES ESTE GRUPO POIDA ESTAR TRABALLANDO.

Burela, 30 de marzo de 2012. O Concello ven de solicitarlle unha subvención á Xunta para proceder á contratación das 12 persoas que formarán parte do Grumir ata finais do ano. O alcalde, José Mª González Barcia, agarda que no prazo dun mes aproximadamente este grupo poida estar en funcionamento.

Barcia explicou que “o Concello acaba de solicitar á Xunta unha subvención para proceder á contratación das doce persoas que formarán parte do Grumir ata o 31 de decembro deste ano. Como se sabe desde a Xunta o que se fai é establecer un plan de cooperación cos Concellos para a contratación de xente que está no paro. E neste sentido en función da orde feita pública o pasado 12 de marzo nós imos solicitar esa subvención e imos pedir a contratación anticipada destas doce persoas para non esperar que nos chegue a resolución da concesión da subvención é poder poñer en funcionamento o Grumir canto antes”. O alcalde asegurou que “non poido adiantar prazos porque sería arriscado, pero agardo que dentro de aproximadamente un mes poidamos ter funcionando e plenamente operativo o Grupo Municipal de Intervención Rápida. Estas doce persoas establecéndose en turnos cubrirán as 24 horas do día desde que comecen o contrato ata o 31 de decembro”. A contía da subvención solicitada ascende a 172.398,24 euros.

O rexedor burelés engadiu que “tamén estamos a preparar a petición de máis subvencións para a contratación de desempregados no marco desa orde do pasado 12 de marzo na que, por exemplo, solicitaremos a concesión dunha subvención para a contratación de 10 socorristas para a época estival co obxectivo de que as nosas praias estean perfectamente atendidas en materia de seguridade”. Neste caso os 10 socorristas traballarán tres meses a xornada completa. O importe da subvención que se solicitará á Xunta sitúase nos 50.475,60 euros.

Remitido