O goberno local recibiu ao cervense Gabriel Galante despois de converterse no campión de España de tiro con arco

O goberno local recibiu ao cervense Gabriel Galante despois de converterse no campión de España de tiro con arco

-O alcalde e o edil de Deportes felicitaron ao arqueiro polo título acadado recentemente e desexáronlle moitos éxitos

-Gabriel Galante participará no curso de tiro con arco que organiza o Concello entre os días 19 e 23 de xuño

Cervo, 9 de xuño de 2012-O alcalde de Cervo, Alfonso Villares e o edil de Deportes, José Ramón Soto, recibiron no Concello a Gabriel Galante Briones, actual campión de España de tiro con arco. Rexedor e concelleiro quixeron facerlle un recoñecemento ao arqueiro, veciño de Cervo, polo seu título acadado no XXIV Campionato de España menores de 14 anos celebrado o 26 e o 27 de maio na cidade valenciana de Gandía.

Villares e Soto transmitíronlle ao mozo arqueiro, de tan só 13 anos de idade, a súa alegría pola recente vitoria. “Gabriel é unha auténtica promesa do tiro con arco que dende moi pequeno amosou un talento especial nesta disciplina e que acumula numerosos títulos no seu palmarés” asegura o rexedor, “polo que só nos queda darlle os nosos parabéns, animalo a seguir preparándose para novas competicións e desexarlle moitos éxitos na súa carreira, que se augura longa e frutífera”.

Ao mesmo tempo, o edil de Deportes transmitiulle a disposición do Concello para facilitarlle medios e instalacións para seguir coa súa preparación. “Ao igual que ocorreu no seu adestramento para o campionato de España, dende o Concello ofrecémoslle a nosa plena colaboración para que continúe a súa preparación nas instalacións municipais”.

O mérito de Gabriel Galante Briones no campionato de España foi dobre, xa que era a primeira vez que participaba nunha competición estatal, e estreábase cunha vitoria. Pero ademais, o arqueiro do Club Castelarco de Alfoz conta con numerosos títulos a nivel autonómico, como o acadado recentemente en Lugo, onde se proclamou campión galego infantil de tiro con Arco.

Curso de Tiro con arco

O Concello de Cervo ten previsto organizar un curso de tiro con arco entre os días 19 e 23 de xuño no campo de fútbol da Veiga destinado a todas as persoas a partir de 8 anos que desexen aprender a técnica deste deporte olímpico. Un acontecemento deportivo no que tamén estará presente Gabriel Galante. O prazo de inscrición está aberto ata o 18 de xuño na Casa do Concello de Cervo e na Casa da Cultura de San Ciprián.