O BNG de Viveiro presenta unha moción para garantir a seguridade na estrada LU-862

Bernardo Fraga Galdo con domicilio a efectos de notificación en Avda. de Ferrol nº20 Entrechán 20-A, en nome e representación do Grupo Municipal do Bloque Nacionalista Galego de Viveiro, presenta a seguinte:

MOCIÓN PARA GARANTIR A SEGURIDADE DAS VECIÑAS E VECIÑOS DE VIVEIRO NA ESTRADA LU-862 AO SEU PASO POLA CASANOVA.

EXPOSICIÓN DE MOTIVOS

A estrada LU-862 está a ser reparada por parte da Consellería de Medio Ambiente, Territorio e Infraestructuras da Xunta de Galiza, coa colocación dun novo pavimento, nova sinalización horizontal e vertical, e novas beirarrúas entre a zona de Lodeiro e o Plantío en Celeiro. Esta obra, moi demandada polas veciñas e veciños do noso Concello, foi por fin executada, e está a piques de rematar, logo de numerosos retrasos para a súa execución. Cabe destacar, a mellora nas condicións de circulación dos vehículos ao seu paso por Viveiro, así como a mellora na sinalización e na seguridade de vehículos coas novas dimensións dos pasos de peóns elevados.

Na zona de A Casanova, en Celeiro, ao longo do tempo sucedéronse accidentes no cruce de acceso a Atalaia, o último días atrais, cando varios vehículos se viron implicados nun accidente que produxo danos persoais de gravidade. O cruce, non ten moi boa visibilidade en ámbolos dous sentidos, pero é de vital importancia para as veciñas e veciños da Casanova e Atalaia que o utilizan diariamente, para acceder e sair dos seus domicilios. A maior parte destes accidentes son provocados polo exceso de velocidade dos vehículos que circulan pola LU-862 debido a que a sinal de limitación de velocidade a 50 km/h se atopa no mesmo cruce, e non existe ningún tipo de sinalización en sentido Viveiro que obrigue a reducir a velocidade con anterioridade.

Nas obras que está a realizar a Consellería de Medio Ambiente, Territorio e Infraestructuras, na sinalización horizontal, permítese o acceso ao Cruce da Atalaia, que é imprescindible, pero non se fixo previsión dun carril secundario de acceso ou de aceleración por falta de espazo no ancho da estrada.

Co fin de garantir a seguridade de veciñas e veciños e peóns, que circulan pola LU-862 e beirarrúas, sería imprescindible a modificación da situación da sinal de 50, e instalala uns cen metros máis arriba dirección Area. Así como por parte da Consellería, instalar algún tipo de elemento reductor de velocidade que impida aos vehículos circular a velocidades inadecuadas e perigosas para os usuarios.

ACORDO

1. Instar á Consellería de Medio Ambiente, Territorio e Infraestructuras a mellorar as condicións de seguridade da LU-862 ao seu paso pola Casanova en Celeiro.

2. Solicitar á Consellería de Medio Ambiente, Territorio e Infraestructuras a modificación da sinalización vertical no cruce de Acceso á Atalaia, sentido Viveiro, e trasladar a sinalización de limitación de velocidade a 50, uns cen metros en dirección Area, e a colocación de algún tipo de elemento que obrigue a reducir a velocidade dos usuarios da estrada ao seu paso pola Casanova.

3. Dar traslado, do presente acordo aos Grupos Parlamentares do Parlamento Galego para o seu coñecemento.