O éxito de Alternativa Galega de Esquerda osixena o Parlamento e impide unha maior vitoria electoral do PP, asegura AGE

A Permanente de Espazo Ecosocialista realizou unha primeira análise dos resultados
das eleccións autonómicas:
Os ecosocialistas galegos chaman á cidadanía a mobilizarse
masivamente na folga Xeral do 14-N para frear as políticas de recortes
O éxito de Alternativa Galega de Esquerda osixena o
Parlamento e impide unha maior vitoria electoral do PP
A Permanente de Espazo Ecosocialista reunida hoxe mércores 24 de outubro fixo un
primeiro balance do resultado electoral das pasadas eleccións autonómicas e da
campaña de Alternativa Galega de Esquerda.
Os ecosocialistas galegos láianse a vitoria electoral do Partido Popular que o único
que demostra é que aínda existe un alto grao de desafección política tal como o
demostra o crecemento da abstención (situada nun 36,2%) e o volume numeroso de
votos en branco e nulos que, co 2,69% e o 2,55% respectivamente, se converten na
quinta e na sexta opcións electorais por riba doutras forzas que se presentaron a estas
eleccións.
Para Espazo Ecosocialista esta desafección no electorado da esquerda supón que
non se foi capaz de mobilizalo, coa conseguinte vitoria do Partido Popular malia as
súas políticas de recortes e de ter caído máis de 100.000 votos con respecto ás
autonómicas anteriores.
As causas desta desmobilización hai que buscalas fundamentalmente na inexistencia
dunha oposición parlamentaria durante a pasada lexislatura, mesmo nalgúns casos de
máxima urxencia como o das caixas de aforros, cun seguidismo do goberno por parte
dos grupos da oposición que foi asentando na cidadanía a idea dunha carencia de
alternativa.
Con todo, o devalo en votos e porcentaxe do Partido Popular indica un rexeitamento
claro das súas políticas, rexeitamento que a cidadanía debe seguir a expresar na rúa
para frear o desmantelamento do estado social e democrático. A primeira
oportunidade para iso é a próxima folga xeral convocada polas centrais sindicais para
o 14-N, que debe ser un exercicio masivo contra as políticas de axuste.
O feito de que o PP teña a súa maior caída no voto urbano, ata o punto de que se
hoxe fosen as eleccións municipais non gobernaría practicamente ningunha das
grandes cidades e vilas medianas de Galicia, é un síntoma claro de esgotamento do
proxecto da dereita.
Espazo Ecosocialista quere amosar a súa satisfacción polo resultado espectacular
de Alternativa Galega de Esquerda, que non só irrompe con forza no Parlamento,
converténdose na terceira forza da cámara con 200.000 votos e 9 deputados, senón
que o consegue con poucas semanas de existencia e con escasos recursos.
O éxito de AGE demostra a necesidade de novos referentes para a cidadanía, recolle
parte da desafección que doutro xeito tería amplificado a vitoria electoral do PP e,
sobre todo, osixena un Parlamento necesitado de maior pluralidade política.
Os resultados nas cidades, que a sinalan como segunda forza nalgunha delas, sinala
a conexión de AGE cos sectores máis dinámicos do país, especialmente coa
mocidade.
Para Espazo Ecosocialista, o noso candidato, Xosé Manuel Beiras, foi quen de
catalizar, grazas á súa traxectoria política e ética, o descontento social, pero, ademais,
a aposta da unidade na pluralidade actuou como un elemento mobilizador.
A superación da división nacionalismo/non nacionalismo a través dun proxecto
nacional é fundamental nunha etapa na que o eixo social e democrático adquiren
preponderancia. Por iso cómpre seguir avanzando en maiores graos de unidade.
Para Espazo Ecosocialista, a coalición AGE vai ter que asentarse nesa cultura plural
da esquerda onde convivan a esquerda independentista, a esquerda federalista e a
esquerda nacional renovadora,construíndose de xeito estable e ligada aos
movementos e organizacións sociais para canalizar as súas demandas e propostas.
Espazo Ecosocialista reunirá o seu Consello Político Nacional o próximo sábado 27
de outubro, que afondará máis nesta primeira análise de urxencia e onde fixará os
seus obxectivos inmediatos tanto no referente ao traballo de AGE como ao do propio
partido